Frantsııanyń birneshe munaı óńdeý zaýytynda jumysshylar ereýili jalǵasyp jatyr

BRıÝSSELЬ. QazAqparat – Apta basynda Frantsııanyń keıbir janarmaı quıý beketterinde benzın tapshylyǵy paıda boldy. Buǵan energetıka salasyndaǵy alpaýyt TotalEnergies kompanııasy jumysshylarynyń ereýili sebep boldy, dep habarlaıdy QazAqparat.

«Frantsııadaǵy janarmaı quıý stantsııalarynda birneshe kún boıy uzynsonar kezek ornaǵany – TotalEnergies-tiń úsh munaı óńdeý zaýytynda úlken ereýildiń nátıjesi», - dep jazdy dúısenbide Frantsııanyń La Croix gazeti.

«TotalEnergies-tegi ereýil seısenbi kúni tańerteń bastaldy. El úkimeti tarapynan qysym kúsheıgenine qaramastan, CGT odaǵynyń úndeýine kóp adam shyqty» deıdi CGT úılestirýshisi Erık Sellını.

«Búgin tańerteń qyzmetkerlerdiń basym kópshiligi ereýildi jalǵastyrýdy jaqtap daýys berdi. Biz áli de basshylyqpen kelissózdiń egjeı-tegjeıin kútemiz», - dep jazady belgııalyq Le Soir.

Frantsııada barlyǵy 3,5 myń janarmaı quıý stantsııasy bar bolsa, árbir úshinshi janarmaı quıý stantsııasy TotalEnergies-ke tıesili.

Frantsýz aqparat quraldary álemdegi eń iri energetıkalyq korporatsııalardyń birinde jumysshylar ereýili osy kúnderi aıaqtalady degen úmit bar dep jazdy.

Jeksenbide basshylyq jumysshylar jalaqysy týraly kelissózdi jalǵastyrýǵa kelisip, eńbekkerlerdiń jumysqa qaıta kirisýin surady.

Olaı bolǵanymen, CGT jumysshylarynyń solshyl kásipodaǵy kompanııa basshylyǵyn «bopsalady» dep aıyptap, bul usynysty qabyldamady.

TotalEnergies-tiń birinshi toqsandaǵy 10,6 mlrd dollar kólemindegi tabysyn sóz etken kásipodaq 2022 jyly jumysshylar jalaqysyn 10 paıyz kóterýdi talap etip otyr.

Foto: la-croix.com