Frantsııanyń Ajen qalasynda sý basqan kóshelerden turǵyndar evakýatsııalanyp jatyr

NUR-SULTAN. QazAqparat – Ajen qalasynyń bıligi men Lo men Garonna (eldiń ońtústik-batysynda) departamentiniń qutqarý qyzmeti qazirgi ýaqytta birneshe kóshedegi turǵyndardy evakýatsııalap jatyr. Olardyń úılerin tolassyz jaýǵan jaýyn saldarynan sý basqan. Bul týraly BFM telearnasyna qala meriniń orynbasary Klemans Bradnolen-Rober málimdedi, dep habarlaıdy QazAqparat.

«Qazirgi ýaqytta Garonna men Mas ózenderi arnasynan tasyǵan joq. Sý tasqyny birneshe saǵat ishinde jaýyn-shashynnyń jaýýyna jáne káriz júıesiniń mundaı kóp mólsherdegi sýdy ótkize almaýyna baılanysty boldy», - dep túsindirdi mer. Ajendegi «Meteo Frans» qyzmetiniń deregine sáıkes, eki saǵattyń ishinde bir sharshy metrge 130 mm jaýyn-shashyn jaýǵan. Bul eki aıdaǵy mólsher. Mundaı jaǵdaı sońǵy ret tek 1941 jyly bolǵan.

Ajen qalasynda birneshe kvartaldaǵy sý deńgeıi bir metrden asady. Úılerdiń birinshi qabatyn, jertólelerdi, jerastyndaǵy garajdardy, kóshedegi avtokólikterdi sý basyp qalǵan. Qalaǵan baratyn birneshe tasjol da sý astynda qalǵan. Jalpy, Lot-ı-Garonna departamentindegi birneshe aýdanǵa 50-150 mm, tipti 200 mm jaýyn-shashyn túsken.

Aıta keteıik, sársenbi kúni Frantsııanyń 32 departamentinde aýa raıynyń qolaısyzdyǵyna baılanysty «qyzǵylt sary» deńgeı jarııalandy.