Frantsııanyń áskerı attashesi qazaqstandyq bitimgerlerdi daıarlaý ortalyǵynda boldy

ALMATY. QazAqparat - Qazaqstandaǵy Frantsııa Elshiliginiń janyndaǵy Frantsýz Respýblıkasynyń Áskerı attashesi polkovnık Jan-Fılıpp Tarde Qorǵanys mınıstrliginiń Bitimgerlerdi daıarlaý ortalyǵyna baryp qaıtty, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Sapar ekijaqty yntymaqtastyqty odan ári nyǵaıtý máselelerin talqylaý jáne Frantsııa Qarýly Kúshteriniń ókilin Frantsýz Alıansy uıymdastyrǵan bitimgerlerge arnalǵan frantsýz tilin oqytýdyń qarqyndy kýrsyn ótkizý barysymen tanystyrý úshin uıymdastyryldy.

Polkovnık Jan-Fılıpp Tarde tyńdaýshylarmen áńgimelesti. Ol el ofıtserleriniń osyndaı qysqa ýaqyt ishinde qol jetkizgen mashyqtarynyń deńgeıi joǵary ekenin atap ótti. Aıta ketsek, Bitimgerlerdi daıyndaý ortalyǵynda 20 qyrkúıek pen 7 jeltoqsan aralyǵynda frantsýz tilin úırenýdiń bastapqy qarqyndy kýrsy ótip jatyr. Qorytyndy emtıhandy sátti tapsyrǵandarǵa halyqaralyq sertıfıkattar beriledi.

Kýrs tyńdaýshysy – bitimgerlik jáne tildik daıarlyqty taldaý jáne baqylaý basqarmasynyń bastyǵy polkovnık Rýslan Meıirmanov polkovnık Tardege oqýdy uıymdastyrýǵa qosqan jeke úlesi úshin alǵys bildirdi. Ol bitimgerler úshin frantsýz tilin úırenýdiń mańyzy artyp kele jatqanyn atap ótti. Óıtkeni ekinshi resmı til frantsýz tili bolyp sanalatyn elderde BUU-nyń birqatar bitimgershilik mıssııalary atqarylady. Olar: Ortalyq Afrıka Respýblıkasy, Malı, Kongo Demokratııalyq Respýblıkasy jáne basqalar.