Frantsııalyq boıjetken «Álem arýy» baıqaýynyń jeńimpazy atandy
ASTANA. QazAqparat - Fılıppın astanasy Manıla qalasynda «Álem arýy» baıqaýynyń aqtyq saıysy aıaqtaldy.
Frantsııadan kelgen 23 jastaǵy Irıs Mıttener «Álem arýy» ataǵyna laıyq dep tanyldy. Ol týraly ázirge Frantsııanyń soltústiginde týǵany, tis dárigeri mamandyǵy boıynsha oqyp jatqany jáne dámi til úıirer taǵamdar daıyndaıtyny ǵana belgili.
Úzdik úshtikke Kolýmbııa men Gaıtı qyzdary endi.
Eske sala ketsek, baıqaýǵa Qazaqstan atynan 19 jastaǵy qazaqstandyq Darına Qulseıitova qatysty. Ol Semeı qalasynda týǵan jáne qazir R.Baıseıitov atyndaǵy Semeı qarjy-ekonomıkalyq kolledjiniń úshinshi kýrs stýdenti.
Bedeldi sulýlyq baıqaýyna kıip shyqqan kóılekterdi qazaqstandyq tanymal dızaınerler Naıl Baıkúshikov pen Aıda Kaýmenova tikti. Darına TOP-10 sulýdyń qataryna enbeı qaldy.
Qazaqstandyq qatysýshy birneshe obrazda sahnaǵa shyqty. Eń este qalǵany - keshki kóılek pen ulttyq kostıým.
«Álem arýy» halyqaralyq baıqaýy osymen 65-ret ótip otyr. 12 qańtar kúni Manılada bastalǵan básekede 86 arý baq synady.
