Frantsııadaǵy zeınetaqy reformasy: jaǵdaı shıelenise tústi
Senbi kúni parıjdik demonstranttar «Jalpyǵa ortaq eńbek konfederatsııasy» kásipodaǵynyń úndeýimen astananyń ońtústiginde jınaldy, buǵan deıin polıtsııa Elıseı alańdary men Kelisim alańyn qorshap alǵan bolatyn.
AFP habarlaǵandaı, sherýge shyqqandar tártip buzǵan – jarnama qalqandaryn soqqylap, qaldyq konteınerleri men velosıpedterdi órtegen, joldy jaýyp, kólikter qozǵalysyna kedergi keltirgen. «Mond» gazetiniń aqparaty boıynsha, tártip saqshylary olardy taratý úshin sý shashyp, kózden jas aǵyzatyn gaz qoldanǵan.
Sondaı-aq, Parıjdegi qaqtyǵystar kezinde 60-tan astam adam ustalǵan. Eldegi aýmaǵynyń úlkendigi jaǵynan úshinshi qala – Lıonda 36 adamnyń qamalǵany aıtyldy. Onda radıkaldar toby jergilikti atqarýshy organdardyń biriniń ǵımaratyna basyp kirgen. Múlikti qıratyp, ortalyq esiktiń mańyn órtemek bolǵan.
Qala meri, «jasyldar» partııasynyń ókili Gregorı Dýse sherýshilerdiń bul áreketin aıyptaıdy, biraq ol el basshylyǵyna da syn aıtady.
«Bıliktiń bul ádiletsiz reformany asyǵys qabyldaýyna negiz joq edi. Kóshede de, parlamentte de jaǵdaı óte shıelenisip tur. Bul – júrgizilip otyrǵan saıasattyń saldary», - dedi ol.
Strasbýrg (shyǵys) pen Lıllde (soltústik) de myńdaǵan adam mıtıngke shyqty. Nant, Brest jáne Bordo (batys) kóshelerinde de narazylyq aktsııalary uıymdastyrylǵan.
Parlamenttiń tómengi palatasynda úkimetke senimsizdik votýmyn jarııalaý daýysqa salynbaq,
Al, kásipodaqtar 23 naýryzda jalpyulttyq ereýilge shyqpaq, bul toǵyzynshy aktsııa bolady.
Eske salaıyq, Frantsııada uzaq ýaqyt boıy zeınetaqy reformasyna qarsy aýqymdy narazylyq sharalary ótti. El boıynsha mıllıonǵa jýyq adam, sonyń ishinde bir ǵana Parıjde 300 myń adam kóshege shyqty.
Saýalnamalarǵa sáıkes, Frantsııa turǵyndarynyń 76%-y reformaǵa qarsy bolǵanymen, el boıynsha myńdaǵan narazylyqtarǵa qaramastan, Frantsııa senaty daýly reformany qoldady.
Frantsııa premer-mınıstri Elızabet Born zeınetaqy júıesine ózgerister engizý týraly zań jobasynyń parlamentte daýysqa salynbastan qabyldanǵanyn málimdedi.
Munan soń oppozıtsııa úkimetke senimsizdik votýmyn jarııalaıtynyn habarlady.
