Frantsııadaǵy shirkeýge shabýyl: din qyzmetkeri kóz jumdy
ASTANA. QazAqparat - Frantsııanyń soltústigindegi Sent-Eten-dıý-Rývre shirkeýiniń ǵımaratyn belgisiz eki adam basyp aldy, nátıjesinde din qyzmetkeri qaza tapty, dep habarlady RIA Novostı.
Shabýylshylar ǵımarattyń artqy esiginen kirgen.
Sent-Eten-dıý-Rývre - Rýan qalasynyń mańynda ornalasqan, el prezıdenti Fransýa Ollandtyń týǵan jeri. Oqıǵa seısenbi kúni tańǵy 9:45-te bolǵan.
Qaskóıler bes adamdy kepilge alǵan: din qyzmetkeri, eki monah áıel jáne dinı qaýym múshesi. Ielikten qashyp shyqqan monah áıel polıtsııaǵa habar bergen.
Shabýylshylardyń pyshaqpen qarýlanǵany belgili boldy.
Tótenshe jaǵdaı ornyna polıtsııa arnaıy kúshteri keldi. Arnaıy operatsııa kezinde eki shabýylshy da óltirildi.
BFMTV telearnasy qylmyskerlerdiń shirkeý ǵımaratynan shyqqan soń óltirilgenin habarlaýda.
Tutqyndar arasynda da bir adam mert boldy. 84 jastaǵy din qyzmetkeri Jak Amel alǵan jaraqattan kóz jumdy. Taǵy eki adam jaralanǵan, olardyń biri «ómir men ólim arasynda» jatyr.
Qylmyskerler týraly ázirge aqparat joq. Jergilikti BAQ bir qylmyskerdiń saqaly bolǵanyn, basynda musylmandyq baskıim bolǵanyn aıtýda.
Al BFMTV telearnasy qylmyskerlerdiń "Allah Akbar" dep aıqaılaǵanyn rastady.
Shabýyldyń sebebi áli anyqtalǵan joq. iTele arnasynyń habarlaýynsha, antıterrorıstik prokýratýra isti tergeýmen aınalysady.
Frantsııa prezıdenti Fransýa Olland shabýyl jasaýshylardyń «Islam memleketi» uıymymen qatysy bar ekenin málimdedi.
Ótken jyldyń qarasha aıynan beri Frantsııada tótenshe jaǵdaı rejımi jumys isteýde. 14 shilde kúni 84 adam qaza tapqan Nıtstsadaǵy teraktiden soń, shekteý taǵy jarty jylǵa sozyldy.
