Frantsııadaǵy shahmat chempıonatynda 8 jasar qazaq balasy 1-oryndy ıelendi
NUR-SULTAN. QazAqparat - Frantsııada jyldam shahmattyń blıts jáne rapıd túrlerinen ashyq chempıonat boldy. Onda Qazaqstannan barǵan jalǵyz sportshy Saýat Nurǵalıev altyn medaldi jeńip aldy, dep habarlaıdy QazAqparat Qazaqstannyń shahmat federatsııasyna silteme jasap.
Chempıonatqa 539 sportshy qatysty.
Saýat 14 partııada 9 ret jeńiske jetti. Saýattan jeńilgenderdiń biri - 22 jastaǵy FIDE sheberi, frantsııalyq Dýdonon Tıbo (ELO - 2292).
«Qazir Saýat - elimizde shahmattan sport sheberine eń jas úmitker. Ótken aıda ol qatarlastarynyń arasyndaǵy ELO reıtınginde kósh bastap, klassıka boıynsha 9 jasqa deıingi balalar arasynda álemniń úzdik shahmatshysy atandy», - deıdi jas daryn ıesiniń bapkeri Erjan Shákenov.
Frantsııa ashyq chempıonaty Le-blan-menıl qalasynda boldy. Bir aıta keterligi, týrnır jas sanattaryna bólingen joq.
«Saýattyń qarsylastarynyń kópshiligi odan jasy úlken ári tájirıbeli shahmatshylar edi. Biraq bizdiń chempıon oǵan pysqyrǵan da joq», - deıdi Nur-Sultan qalasy Shahmat federatsııasynyń prezıdenti Abylaı Tostambekov.
