Frantsııadaǵy narazylyq sherýi: Qala kóshelerinde tártip ornatý úshin 40 myń polıtsııa qyzmetkeri jumyldyrylady
PARIJ. QazAqparat - Jasóspirimniń óliminen soń narazylyq sherýleri ótip jatqan Frantsııa qalalaryna tártip ornatý úshin 40 myń polıtsııa qyzmetkeri jóneltiledi. Bul týraly eldiń ishki ister mınıstri Jerald Darmanen 29 maýsym, beısenbi kúni málimdegen, dep habarlaıdy QazAqparat Deutsche Welle-ge silteme jasap.
Parıj ben onyń shetki aýmaǵynda 5000 polıtsııa qyzmetkeri kóshe tártibin qadaǵalaıdy.
Eldiń bas shaharynda avtobýs jergilikti ýaqytpen keshki 21:00-de jumysyn toqtatatyn boldy. Bılik muny qoǵamdyq kóliktiń jumysyna jaýapty kásiporyndar men jolaýshylardyń qaýipsizdigin qamtamasyz etý úshin istep otyrǵanyn aıtty.
Klamardaǵy komendanttyq saǵat
El astanasynan ońtústik -batysqa qaraı 10 km qashyqtyqta ornalasqan Klamar qalasynda komendanttyq saǵat engizildi. Ol 29 maýsym men 3 shilde aralyǵynda 21:00-den tańǵy 06:00-ge deıin kúshinde bolady.
Jappa ıtártipsizdik bul eldimekendi de aınalyp ótpedi, ótken túnde munda tramvaı órteldi.
150 adam ustaldy
Narazylyq Nanter qalasynda 17 jastaǵy jasóspirim kólik júrgizip kele jatyp, tártip saqshylarynyń toqta degen buıryǵyn elemegen soń, polıtsııa qyzmetkerleri ony atyp óltirýinen keıin týǵan.
Oqıǵa ornyna jedel jetken dárigerler jasóspirimniń ómirin qutqaryp qala almady. Quqyq qorǵaý organdary oqıǵanyń mán-jaıyn anyqtaý úshin tergeýdi bastap ketti.
