Frantsııadaǵy eń eski atom stansasy 2020 jylǵa qaraı jabylady
ASTANA. QazAqparat - Frantsııadaǵy Fessenhaım atom elektrostansasyn jabý jónindegi sheshim qabyldandy. Bul týraly dw.com habarlaıdy.
Frantsýz úkimetiniń qaýlysyna sáıkes stansa Flamanvıl AES-indegi jańa reaktor paıdalanýǵa berilgende jumysyn toqtatady.
Jeksenbide jarııa etilgen qujatqa sáıkes Frantsııadaǵy eń eski AES 2019 jylǵa qaraı Flamanvıl AES-indegi jańa energoblok iske qosylǵan soń jabylady.
Frantsýzdardyń EDF energetıkalyq kontserniniń dırektorlar keńesi Fessenhaım stansasynyń jumysyn toqtatý týraly qujat Flamanvıl reaktory paıdalanýǵa berilerden alty aı buryn qabyldanady degen sheshim shyǵardy. Frantsýz bıligi qabyldaǵan sheshimde osy talap eskerildi.
Flamanvıldegi reaktor bastapqy jospar boıynsha 2012 jyly iske qosylýy kerek edi, alaıda onyń qurylysy kezinde udaıy kedergiler paıda bolyp ol áli iske qosylmaı keledi.
Fessenhaım AES-i 1977 jyly paıdalanýǵa berilgen. Ol Frantsııanyń Strasbýrg qalasynynan 100 shaqyrym, nemisterdiń Fraıbýrg qalasynan 25 shaqyrym, Shveıtsarııanyń Bazel qalasynan 40 shaqyrym jerde seısmıkalyq jaryqtyń ústine ornalasqan. Frantsııa, Germanııa jáne Shveıtsarııanyń qorshaǵan ortany qorǵaýshylary uzaq ýaqyttan beri 40 jyl jumys istegen Fessenhaım AES-iniń jumysyn toqtatý úshin kúresip keledi. Olar atom stansasy jer silkinisi kezinde zardap shegýi múmkin dep qaýiptenedi.
