Frantsııadaǵy COVID-19: Elıseı alańynda maskasyz júrýge bolmaıdy
NUR-SULTAN. QazAqparta – Endi Parıj qalasynda Latyn kvartalyna da, Elıseı alańdaryna da serýendeýge maskasyz jibermeıdi, dep habarlaıdy QazAqparat Euronews-ke silteme jasap.
Frantsııadaǵy epıdemıologııalyq jaǵdaıdyń nasharlaýyna baılanysty, birqatar qalada adam kóp jınalatyn kósheler men oryndarda maska taǵý mindetti bolyp sanalady. Elde koronavırýs testileri ótkizilip, aýrýdyń anyqtalýy 2,4 paıyzǵa deıin ósken. Sońǵy aptanyń ózinde 600 myńnan astam adam analız tapsyrǵan.
«Men kóshede jalǵyz serýendep júrip maska taǵý kerek degenmen kelispeımin. Kóliktiń ishinde, dúkende taǵý mindetti. Alaıda barlyq jerdi únemi taǵý qajet emes», - deıdi Kolmardan kelgen týrıst Andela Nardella.
«Qanshama adam qaıtys boldy, maskany barlyq qoǵamdyq oryndarda taǵýdy mindetti etý kerek. Árıne, sońǵy birneshe kúni bolǵan aptap ystyqta maska taǵý ońaı emes. Biraq ózińdi ǵana emes, ózgeni de oılaý kerek. Biz osylaısha densaýlyǵy nashar adamdardy qorǵaımyz», - dep sanaıdy Parıj turǵyny Anýk Ekpıas.
Frantsııanyń densaýlyq saqtaý mınıstrligi jastar arasynda indetke shaldyqqandar sanynyń óskenin atap ótti. El aýmaǵynda koronavırýs juqtyrýdyń 342 oshaǵy tirkelgen. Parıj ben Marsel aýrý juqtyrý qaýpi joǵary aımaqtar qataryna kirdi.
