Frantsııadaǵy búkilálemdik at sporty jarysyna Mańǵystaý óńiriniń tulparlary qatysady
ASTANA. QazAqparat - Búgin, 27 tamyzda Frantsııanyń Kann qalasynda ár 4 jyl saıyn bir ret ótkiziletin «Búkilálemdik at sporty oıyndary» (World Equestrian Games) bastalady.
Qazaqstannyń atynan jarystar kvalıfıkatsııalarynda chempıon atanyp júrgen Mańǵystaý óńiriniń júırikteri qatystady. Otandastarymyz bul oıyndarǵa kiretin 8 at sporty túriniń ishinde qazaqtyń ulttyq at sport túri - alaman báıgege uqsaıtyn «Endurance»-tan (aǵylshyn tilinen aýdarǵanda - tózimdilik, shydamdylyq) saısyqa túspek. Atap aıtsaq, elimizdiń namysyn «Jezkıik» atty tulparmen shabandoz Qoıshıev Azat; «Doıdan» tulparymen shabandoz Natalıa Dolgıh; Myqyrbaev Buǵabaıdyń «Shabdarqasqasy», shabandoz - Myqyrbaev Bektas; Baǵdabaev Amanǵalıdiń «Jasqanaty», shabandoz - Etrekov Ábish; Sergeı Býıkevıchtiń arab tuqymdas «Araby»; Ratov Sısenniń «Oılysy», shabandoz - Qoıshıev Esenaman syndy shabandozdar qorǵamaq.
«Endurance» sport túri boıynsha shabandozdar belgilengen baǵytpen bir kún ishinde 160 shaqyrymǵa shabady. Álbette, márege alǵashqylardyń biri bolyp jetý tikeleı arǵymaqtyń densaýlyǵy men babyna baılanysty. Sondyqtan dúbirli dodaǵa qatysatyn tulparlardyń densaýlyǵy veterınar-dárigerlerdiń qatań baqylaýynda, dep habarlaıdy QR Ulttyq sport túrleri qaýymdastyǵynan.
