Frantsııada júzdegen myń adam ereýilge taǵy shyqty

PARIJ. QazAqparat – Frantsııada senbi kúni júzdegen myń adam kóshege shyǵyp, úkimettiń zeınetaqy reformasyna qatysty narazylyq bildirdi. Jańashyldyqtar qatarynda zeınet jasyn 62-den 64 jasqa kóterý bar, dep habarlaıdy QazAqparat Euronews-ke silteme jasap.

Sherýge qatysýshylardyń aldyńǵy qatarynda jastar tur. Olar jumys kúnderi ótken narazylyq aktsııalaryna qatysa almaǵan.

Bul joly ereýilge temirjol qyzmetkerleri qatysqan joq, senbi kúni poıyzdar men metro qalypty rejımde jumys istedi. Alaıda, avıadıspetcherlerdiń aıaqasty sherýge qosylýynan Orlı áýejaıynda reısterdiń jartysyna jýyǵy ushpaı qaldy. Orlı – kólemi jóninen el astanasyndaǵy ekinshi áýejaı.

Osy aptada Frantsııanyń zań shyǵarý organdary zeınet jasyn kóterý boıynsha qyzý pikirtalasty bastady.

Senbi kúngi aktsııada birqatar tártip buzýshylyq oryn aldy. Polıtseıler ereýilshilerdi kóz jasaýratatyn gazben taratpaq bolǵan kezde, Parıjdiń ortalyq býlvarynda bir kólik pen birneshe qoqys jáshigi órteldi. Polıtsııa qarý ustap júrý jáne vandalızm syndy túrli zań buzýshylyqtar úshin 8 adam ustalǵanyn málim etti.

Foto: Michel Euler/ The AP