Frantsııada jol apaty saldarynan mıllıondaǵan ara óz balyna batyp ketken
ASTANA. QazAqparat - Frantsııanyń ońtústiginde oryn alǵan jol apaty saldarynan mıllıonnan astam ara qyrylyp qaldy. Bul týraly The Local habarlaıdy.
Árqaısysynda 20 myńǵa jýyq ara bolǵan uıashyqtardy tasymaldap kele jatqan júk kóligi Sosnak qalasynyń mańynda jeńil kólikpen soqtyǵysqan. Soqqy saldarynan uıashyqtar synyp, aralardyń kóbi óz balyna batyp qyrylyp qalǵan. Tiri qalǵan ondaǵan myń ara oqıǵa ornyna kelip jetken polıtseıler men qutqarýshylarǵa shabýyldady. Aldyn ala málimetter boıynsha, apattan keltirilgen shyǵyn somasy 7 myńnan astam eýrony quraǵan. Aıta keteıik, Frantsııa eýropalyq omarta sharýashylyǵy ortalyqtarynyń biri bolyp tabylady. Aldyn ala baǵalaý boıynsha, elde 69 myńnan astam omartashy bar. Negizgi bal óndirisi klımaty omartashylyqpen jyl boıy aınalysýǵa múmkindik beretin eldiń ońtústik-batysynda - Jerorta teńiziniń jaǵalaýynda jaqsy damyǵan.
