Frantsııada jaǵajaıǵa úlken sómke alyp kelýge tyıym salynady

ASTANA. QazAqparat - Frantsııanyń Kann qalasynyń basshylyǵy jaǵajaılarǵa kólemi úlken sómke, chemodan jáne paket alyp kelýge tyıym saldy, dep habarlaıdy 24.kz telearnasy.

Bul - qaýipsizdik úshin qabyldanǵan shara. Óıtkeni olardyń ishine qarý-jaraq, bomba jáne ózge de qaýipti zattar salynýy múmkin degen kúdik bar. Endi jańa ereje 31 qazanǵa deıin kúshin joımaıdy.

- Bizge osyndaı shara qabyldaýǵa týra keldi. Osylaısha, polıtseıler kúdikti jaǵdaı týyndaǵanda, sot sheshimin nemese orderdi kútpeı-aq, lezde áreket ete alady. Bizdiń basty maqsatymyz - turǵyndar men qala qonaqtarynyń qaýipsizdigin qamtamasyz etý, - deıdi Kann qalasynyń meri Devıd Lısnard.

Esterińizde bolsa, 14 shildede Frantsııanyń Nıtstsa qalasynda júk kóligin tizgindegen er adam otshashýdy tamashaýlaǵa jıylǵan bir top kisini qaǵyp ótken edi. Saldarynan 84 adam ajal qushyp, taǵy 300-ge jýyǵy jaralanǵan bolatyn.


foto:ru.rfi.fr