Frantsııada tuńǵysh ıslam ýnıversıteti salynady
ASTANA. 12 qazan. QazAqparat - Frantsııada tuńǵysh ret ıslam joǵarǵy oqý orny ashylatyn boldy. Onyń ǵımaraty Strasbýrg qalasynda turǵyzylady. Atalmysh oqý ordasynyń barlyq jobasyn Túrkııa memleketi qarjylandyrady.
Muslim.kz saıtynyń jazýynsha, osy ýaqytqa deıin 15 mln. eýro bólip qoıǵan eken. Bilim oshaǵynda dinge qatysty dárister ótedi. Sondaı-aq, ımamdar daıarlap shyǵaratyn orta mektep jumys isteıtin bolady.
«Ásirese, osynaý elde týyp-ósken, endi býyny bekip, buǵanasy qatyp kele jatqan jas urpaqqa asyl dinimizdiń qyr-syry úıretiledi. Imamdarǵa arnalǵan mektep dintaný fakýltetiniń shákirtterin daıyndaıdy. Atalmysh ýnıversıtet Frantsııa men búkil Eýropada ıslamı bilim berýde úlgi bolady», - dedi Strasbýrg qalasy ákimshiliginiń keńesshisi Saban Kıper. Bir aıta keterligi, atalmysh joǵarǵy oqý ornynda dintaný sabaqtary aptasyna kem degende alty saǵat oqytylady. Sonymen qatar, munda namaz oqıtyn zal da bolady.
