Frantsııada tótenshe jaǵdaı úsh aıǵa uzartyldy
BRıÝSSELЬ. QazAqparat - Frantsııa prezıdenti Fransýa Olland Nıtstsadaǵy shabýyldy «jaýyzdyq» dep sıpattap, jandarm men polıtseılerge kómektesýge, ásirese shekaralarda qoldaý kórsetýge áskerıler tartylǵanyn aıtty.
Onyń sózine qaraǵanda, shabýyl «terrorlyq sıpatqa» ıe.
26 shildede aıaqtalýy tıis eldegi tótenshe jaǵdaı úsh aıǵa uzartylady.
ІІM basshysy Bernar Kaznev: «Biz terrorıstermen soǵysyp jatyrmyz. Olar qalaı bolsa da bizge aýyr soqqy jasaýǵa tyrysyp jatyr», - dedi.
Frantsııa prezıdenti Fransýa Olland Parıjde tańǵy saǵat 9-da (Astana ýaqytymen saǵat 13:00) bastalatyn Frantsııanyń qaýipsizdigi men qorǵanys keńesiniń otyrysyna qatysý úshin Avınonnan Parıjge oralady.
Beısenbi kúni keshke Nıtstsa jaǵalaýynda Bastılııa qamalyn alý kúnin toılaý barysynda júk kóligi adamdardy basyp-janshyp, keıin kólikten jıylǵan jurtqa oq atqan.
Shabýyl saldarynan 80 adam qaza tapty, onyń ishinde balalar bar, taǵy 18-i aýyr jaraqat aldy, 100-den astamy jaraqattandy.
Frantsııalyq BAQ júk kóliginen 31 jastaǵy Nıtstsa turǵynynyń jeke kýáligin tapqanyn, onyń frantsııalyqpen qatar Týnıs azamattyǵy bolǵanyn habarlady.
Eske sala keteıik, júk kóliginiń júrgizýshisin polıtsııa atyp tastady. Kúsh qurylymdary onyń sybaılastarynyń bolǵanyn ne bolmaǵanyn anyqtap jatyr.
