Frantsııada tolqyn júzdegen delfınniń óleksesin jaǵalaýǵa shyǵardy
NUR-SULTAN. QazAqparat - Teńiz tolqyny júzdegen delfınniń óleksesin Frantsııa jaǵalaýlaryna shyǵardy. Olardyń kópshiligi balyqshylardyń toryna oralyp, mert bolǵan, dep habarlaıdy QazAqparat Phys.org basylymyna silteme jasap.
«Delfın tumshalarynyń shamamen 85 paıyzy abaısyzda balyqshylardyń toryna túsip, mert bolǵan. Rasynda, ólimtikterdiń naqty sany tolqynmen jaǵaǵa shyqqandarynan tórt ese kóp bolýy múmkin dep joramaldap otyrmyz», - deıdi PELAGIS tabıǵatty qorǵaý uıymynyń ekology Olıve van Kanneıt (Olivier van Canneyt). Sońǵy jyldary kıt, delfın sekildi sý janýarlary balyqshylardyń toryna túsip, mert bolý jaǵdaıy jıi kezdesip jatyr. Máselen, osydan tórt jyl buryn kóktemde Chılı jaǵalaýlarynan sý janýarlarynyń ólimtigi tabylyp, qysqa qaraı olardyń jalpy sany 337-ge jetken.
Van Kanneıttiń aıtýynsha, bul jolǵy apat Frantsııa úshin sońǵy jyldardaǵy rekordtyq kórsetkish. Ekologtar balyqshylardy delfınderdi úrkitetin arnaýly býılardy ornatýǵa shaqyryp jatyr.
Ǵalymdar, qoldanylyp jatqan sharalarǵa qaramastan delfınderdiń qyrylýy toqtamasa, Atlant muhıtynyń soltústiginde olardyń sany kúrt qysqaratyn kúnder jaqyn ekenin aıtyp, dabyl qaǵýda.
