Frantsııada taǵam quramyn anyqtaıtyn halal-tester oılap tabyldy
ASTANA. QazAqparat - Capital Biotech kompanııasynyń kásipkerleri Abderrahman Chaoı men Jan Fransýa Jıýlen azyq-túlik óniminiń quramyn anyqtaıtyn jańa tásil oılap tapty, dep habarlanǵan «Nur Astana» meshitiniń saıtynda.
Atalmysh qural ónimniń quramynda dońyz eti men alkogoldi zattardyń bar-joǵyn anyqtaı alady. Qural quramyndaǵy taıaqshany tekseriletin ónim men jyly sý quıylǵan ydysqa salyp, birneshe mınýt kútesiz. Nátıjesinde taıaqshada 1 jolaq syzyq paıda bolsa, azyqtyń quramy taza degen sóz. Al eki jolaq shyqsa, bul taǵam halal bolmaǵany. Endi musylman kásipkerler bul apparatty munan ári jetildirip, soıylǵan maldyń eti ıslam sharıǵatyna saı soıyldy ma, álde toqpen soǵý sekildi zııandy ádisterdi paıdalandy ma, osy jaǵyn anyqtaýdy kózdep otyr. Frantsýz basylymdary Capital Biotech kásipornynyń bolashaǵy zor ekenin jarysa jazýda. Sebebi, ýaqyt óte Eýropa keńistiginde musylmandardyń kóbeıýi halal ónimge degen suranystyń artýyna alyp kelmek.
