Frantsııada saılaý aldy tynyshtyq kúni ornady
ASTANA. QazAqparat - Senbi kúni Frantsııada daýys berýge bir kún qalǵanda tynyshtyq kúni ornady. Osy sátten bastap prezıdenttikke úmitkerlerdiń úgit-nasıhat naýqanyn júrgizýlerine, al buqaralyq aqparat quraldaryna - frantsýzdyq daýys berýshilerdiń pikirine áser etetin materıaldar jarııalaýyna tyıym salyndy, dep habarlaıdy newsru.com .
Qoǵamdyq pikir saýalnamasyna sáıkes, prezıdenttik saılaýda «Alǵa!» qozǵalysynyń kóshbasshysy, burynǵy ekonomıka mınıstri Emmanıýel Makron halyqtyń súıiktisi bolyp shyqty. Oǵan saılaýshylardyń 23 paıyzy daýys berýge daıyn otyr. Ol 39-da eń jas úmitker.
Beısenbi kúni keshkisin ótken prezıdenttikke úmitkerlerdiń sońǵy telesaıysy barysynda Makron «teraktiniń aldaǵy jyldary frantsýzdardyń kúndelikti ómiriniń bir bóligi bolyp qala beretindigin» málimdedi. Sondyqtan, Frantsııa terrorızmge qarsy eldiń aýmaǵynda da, onyń syrtynda da kúsh biriktirip, kúresedi. Makron 2022 jylǵa deıin jumyssyzdyq deńgeıin tómendetip, eń tómengi zeınetaqy men járdemaqyny kóterýge ýáde etti.
«Ulttyq front» kóshbasshysy Marın Le Pen de Makronmen qatar kele jatyr. Birinshi kezeńde oǵan saılaýshylardyń 22 protsenti daýys berýge daıyn boldy. Osy eki úmitker ekinshi kezeńge ótedi dep boljanýda.
Telesaıysta Le Pen «frantsýzdarǵa tórt mańyzdy máseleni: shekarany kúzetýdi, zań qabyldaýda baqylaýdy, el ekonomıkasyn baqylaýdy, ulttyq valıýtany qaıtarýǵa» ýáde berdi.
Frantsýz saıasattanýshysy Bernar Sananes suhbatynda, «Respýblıkashyl» Fransýa Fııona men «Baǵynbaıtyn Frantsııa» qozǵalysynyń kóshbasshysy Jan-Lıýk Melanshonnyń ekinshi kezeńge ótý múmkinshiligi joǵary ekendigin aıtty. Sońǵy saýalnamaǵa sáıkes, olarǵa saılaýshylardyń 20%-y jáne 19%-y daýys bergen.
