Frantsııada prezıdent saılaýyndaǵy úmitkerge qatysty tergeý bastaldy
ASTANA. QazAqparat - Parıj prokýratýrasy Frantsııa prezıdentine úmitker, «Alǵa» saıası qozǵalysynyń jetekshisi Emmanýel Makronǵa qatysty aldyn ala tergeýdi bastady, dep habarlady Europe 1 radıostansasy.
Tergeý Makronnyń ekonomıka mınıstri kezindegi 2016 jyldyń 6 qańtarynda Las-Vegasta ótken French Tech Night sharasyna qatysýyna baılanysty. Tergeý nusqasy boıynsha, Makron basqarǵan mınıstrlik eshqandaı tender ótkizbesten sol sharanyń uıymdastyrylýyn Havas kompanııasyna tapsyrǵan.
Buǵan deıin Frantsııa quqyq qorǵaý organdary Frantsııa prezıdenttigine taǵy bir úmitker, «Respýblıkashylar» partııasynan shyqqan Fransýa Fııonǵa qatysty resmı tergeýdi bastaǵan edi. Le Canard Enchaine basylymynyń jazýynsha, 14 naýryz kúni oǵan qarajatty jymqyrý jáne zańsyz ıemdený aıyptary taǵyldy.
Sondaı-aq, prokýratýra Fııonnyń áıeli Penelopaǵa qatysty tekseristi bastady. Fransýa Fııon parlamentte jumys istegende, áıeli segiz jyl boıy onyń kómekshisi retinde aılyq alyp otyrǵan. Biraq, tıisti mindetterin oryndamady degen kúdik bar.
