Frantsııada pıtstsa pisiretin aspaz 16 jyldan beri qashyp júrgen mafıozı bolyp shyqty

ASTANA. QazAqparat - Interpol Frantsııanyń shyǵysyndaǵy Sent-Eten qalasynda 16 jyl boıy qashyp júrgen mafıozı ustalǵanyn habarlady, dep jazady QazAqparat Euronews agenttigine silteme jasap.

Kalabrııa mafııasynyń «Ndrangeta» laqap atymen belgili ókili 63 jastaǵy Edgardo Greko beısenbi kúni tańerteń qamaýǵa alyndy.

Ol 1991 jyly qańtarda eki kisi óltirý jáne 1991 jyly shildede adam óltirýge oqtalý qylmysy úshin ómir boıyna bas bostandyǵynan aıyrý jazasyna kesilgen edi.

Frantsýz polıtsııasy Grekony ıtalıandyq karabınerlerdiń eki seriktes eldiń I-Can jobasynyń (Interpoldyń Ndrangetaǵa qarsy yntymaqtastyǵy) bir bóligi retinde bólisken aqparat negizinde ustady.

Italııanyń ishki ister mınıstri Matteo Pıantedosı bul mańyzdy birlesken operatsııaǵa óte rıza ekenin aıtty.

Italııalyq AGI aqparat agenttiginiń habarlaýynsha, Greko Sent-Etendegi pıtstserııada Paolo Dımıtrı degen atpen pıtstsa pisirýshi bolyp jumys istegen.

Boljam boıynsha, ol ózi turǵan Kozentsa qalasyndaǵy eń mańyzdy Perna-Pranno klanynyń múshesi bolǵan.

Ótken aıda karabınerler Sıtsılııanyń Palermo qalasynda 30 jyl boıy jasyrynyp júrgen ıtalıandyq mafıozı Matteo Messıný Denarony qamaýǵa alǵan edi.

Foto: Carabinieri di Cosenza