Frantsııada Parıjdegi lańkestikten keıin birneshe meshitke shabýyl jasaldy
ASTANA. QazAqparat - Frantsııa astanasyndaǵy Charlie Hebdo jýrnalynyń redaktsııasynda oryn alǵan lańkestik áreketten keıin kelesi kúni eldiń birqatar qalalaryndaǵy birneshe meshit shabýylǵa ushyrady.
Olardyń arasynda bolýy yqtımal baılanys ázirshe anyqtalmady, dep jazady TASS.
Ouest France gazetiniń habarlaýynsha, beısenbi kúni tańerteń belgisiz bireýler Le-Man qalasyndaǵy Sablon meshitiniń aýlasyna birneshe granata laqtyrǵan. Olardyń bireýi ǵana jaryldy. Abyroı bolǵanda, eshkim zardap shekpedi. Qazirgi kezde dinı ǵımarat ornalasqan aýdandy polıtsııa qyzmetkerleri qorshap aldy. Taǵy bir shabýyl jerortateńizdik jaǵalaýdaǵy Od departamentinde ornalasqan Por-la-Nývel qalasynda oryn alǵan. Belgili bolǵandaı, qylmyskerler sársenbi kúni keshke keshki namazdan keıin shamamen bir saǵat ótken soń namaz oqý zalynda tapanshadan oq jaýdyrǵan. Sol kezde bólmede eshkim bolmady, zardap shekkender joq. Beısenbi kúni Frantsııanyń shyǵysynda ornalasqan Vılfransh-sıýr-Son qalasyndaǵy jarylys týraly habarlanǵan edi. Oqıǵa jergilikti meshitke jaqyn turǵan meıramhanada oryn alǵan. Zardap shekkender týraly aqparat joq, jarylystyń sebebi de belgisiz. Tergeý amaldary júrgizilýde. Esterińizge sala keteıik, keshe úsh qaskúnem Parıjdiń 11-shi okrýginde ornalasqan Charlie Hebdo redaktsııasyna bas salyp, ondaǵy adamdarǵa oq jaýdyrǵan. Oqıǵa saldarynan 12 adam qaza tapty, sonyń ishinde basylymnyń tórt sýretshisi, polıtsııanyń eki qyzmetkeri jáne France Inter radıostansasynyń sholýshysy bolǵan. Taǵy 11 adam túrli jaraqattar aldy.
