Frantsııada Napoleonnyń taǵy satyldy
NUR-SULTAN. QazAqparat - Frantsııa ımperatory Napoleon І Bonaparttyń taǵy frantsýz monarhtarynyń Fontenblo tarıhı rezıdentsııasyndaǵy aýktsıonda 500 myń eýroǵa satyldy. Bul týraly saýdany ótkizgen Osenat aýktsıon úıi Twitter paraqshasynda málim etti, dep habarlaıdy QazAqparat.
Taqty satyp alǵan adamnyń aty-jóni jarııa etilgen joq.
Aǵashtan jasalyp, syrtyn altynmen japqan taq o basta nebári 80 myń eýroǵa baǵalanǵan. Buǵan uzaq ýaqyt boıy Napoleon otyrǵan taqtardyń sany beseý degen pikir áser etti. Olardyń biri Parıjdiń Tıýılrı saraıynda, ekinshisi Sen-Klý qamalynda, úshinshisi Senatta, tórtinshisi Ulttyq jınalys ǵımaratynda, besinshisi Parıj merııasynda saqtaýly.
Aýktsıon úıiniń málimetine qaraǵanda, HІH ǵasyrdyń aıaǵynda amerıkalyq fılantrop Maıkl Genrı de ıAng Napoleonnyń osy taǵyn San-Frantsıskodaǵy beıneleý óneri mýzeıine syıǵa tartqan.
Aıta keteıik, bıyl tamyz aıynda frantsýz ımperatorynyń týǵanyna 250 jyl tolady.
