Frantsııada Muhtar Ábilázovti qamaýdan bosatty
ASTANA. QazAqparat - Frantsııanyń Joǵarǵy ákimshilik soty - Memlekettik keńes Muhtar Ábilázovti Reseıge ekstradıtsııalaýdan bas tartqany týraly sheshim qabyldaǵannan keıin juma kúni keshke ol birden túrmeden bosatyldy. Bul týraly Frans Press agenttigine silteme jasap Telegraph habarlady.
Buǵan deıin habarlanǵandaı, BTA bankiniń burynǵy basshysy Muhtar Ábilázov Qazaqstanda, Reseıde jáne Ýkraınada barlyǵy 11 bap boıynsha aıyptaldy.
2009 jyldyń 6 naýryzynda Ábilázovke halyqaralyq izdeý jarııalandy. Sebebi oǵan jáne ol basshylyq etken qylmystyq topqa senip tapsyrylǵan múlikti ıemdengendigi jáne talan-tarajǵa salǵandyǵy, aldaý jáne senimge qııanat keltirý arqyly bóten múlikti urlaǵandyǵy, zańsyz jolmen tabylǵan aqsha qarajattaryn zańdastyrǵandyǵy, bank qarajattaryn zańsyz paıdalanǵandyǵy, ókilettikti asyra paıdalanǵandyǵy jáne qylmystyq topqa basshylyq etkendigi úshin Qazaqstan Respýblıkasy Qylmystyq kodeksiniń 176-baby 3-bóliginiń «b» tarmaǵymen, 176-baby 3-bóliginiń «a», «b» tarmaqtary boıynsha - 24-babynyń 3-bóligimen, 177-baby 3-bóliginiń «a», «b» tarmaqtarymen, 193-baby 3-bóliginiń «b», «v» tarmaqtarymen, 220-babynyń 1-bóligimen, 228-babymen, 235-baby 3-bóligimen qarastyrylǵan aıyptar taǵylǵan bolatyn.
Ábilázov Frantsııada 2013 jylǵy 31 shildede ustaldy. The Real Deal veb-portalynyń habarlaýynsha, amerıkandyq bıznesmen jáne Chetrit Group kompanııasynyń teń ıesi Djo Chetrıt Qazaqstannan eki sybaılasymen birge uıymdasyp, aqshanyń izin jasyrýdyń halyqaralyq kestesine qatysty dep aıyptalyp otyrǵany belgili boldy. Atalǵan kesteniń aıasynda Chetrıt Almatynyń burynǵy ákimi Vıktor Hrapýnov pen «BTA Bankiniń» burynǵy basshysy Muhtar Ábilázovtiń Nıý-Iork qalasynda jyljymaıtyn múlikti satyp alýyn uıymdastyryp, sol arqyly 40 mıllıonǵa jýyq dollardy jylystatýǵa kómektesti.
Dúısenbide Almaty qalasy men «BTA Bank» Manhetten sotyna talaparyz berdi. BTA Bank, Almaty qalasynyń ákimdigi jáne Qazaqstan Respýblıkasy Ádilet mınıstrliginiń birlesken jumys nátıjesinde AQSh-ta M.Ábilázov pen V.Hrapýnovtyń qylmystyq toby urlaǵan ondaǵan mıllıon dollar buǵattaldy.
