Frantsııada qulaǵan turǵyn úı qırandysynyń astynan eki adamnyń denesi tabyldy

PARIJ. QazAqparat – Frantsııanyń ońtústigindegi Marsel qalasynyń ortalyǵynda opyrylyp qulaǵan tórt qabatty turǵyn úı úıindilerinen eki adamnyń denesi tabyldy, dep habarlaıdy QazAqparat France24.com-ǵa silteme jasap.

Olar qutqarýshylar iz-tússiz joǵalǵan alty adamdy izdeý kezinde, jarylystan keıin shamamen 24 saǵat ótken soń tabylǵan.

Qyzmetkerler kran men shamdardyń kómegimen qutqarý jumystaryn júrgizdi, biraq úıindiler astyndaǵy jalyn olardyń jumysyna kedergi keltirip, órt sóndirýshilerdiń ıtterdi paıdalanýyn qıyndatty. Ǵımarat qırandylaryndaǵy jalynmen 100-den astam órt sóndirýshi kúresti.

«Erekshe qıyndyqtarǵa baılanysty oqıǵa ornynan denelerdi shyǵarý ýaqytty alady. Shyǵarylǵannan keıin sot organy olardyń kim ekenin anyqtaýǵa kirisedi», - delingen órt sóndirý bóliminiń qysqasha málimdemesinde.

Máıitter tabylmas buryn, jergilikti prokýror Domınık Loýrens tilshilerge segiz adamnyń «telefonǵa jaýap bermegenin» aıtqan.

Jarylystyń sebebi áli anyqtalǵan joq, biraq tergeýshiler onyń gazdyń shyǵýynan boldy degen nusqany qarastyryp jatyr.