Frantsııada koronavırýstyń jańa shtamy anyqtaldy, AQSh-ta antıdeneleri bar sábı dúnıege keldi

LONDON. QazAqparat – Kóptegen elder AstraZeneca vaktsınasyn qoldanýdy ýaqytsha toqtatatynyn málimdedi. Bul rette, Eýropalyq retteýshi preparattyń tıimdiligine senim bildirip otyr. Al Frantsııada ǵalymdar qarapaıym PTR-testiler anyqtaı almaıtyn koronavırýstyń jańa shtammyn tirkedi. AQSh-ta koronavırýsqa vaktsına alǵan anadan antıdeneleri bar shaqalaq dúnıege keldi. QazAqparat bul týraly VVS-ge silteme jasap habarlaıdy.

EO retteýshisi AstraZeneca vaktsınasyna senimin bildirip otyr

Seısenbi kúni Dárilik quraldardyń eýropalyq agenttigi (EMA) ózinde bar málimetterge sáıkes AstraZeneca vaktsınasy men vaktsına egilgen keıbir adamdarda trombtardyń paıda bolýy arasynda esh baılanys joqtyǵyn taǵy bir málimdedi.

EMA basshysy Emer Kýk bul vaktsınanyń paıdasy barlyq qaýipterdiń ornyn basatynyna tolyq senimdi ekenin basa aıtty.

AstraZeneca málimetinshe, Eýropada vaktsına egilgen 17 mıllıon adamnyń arasynda trombozdyń 37 oqıǵasy tirkelgen. EMA bul oqıǵalardyń árqaısysyna taldaý júrgizýde.

«Tromboz EO-daǵy myńdaǵan adamda bolatynyń bilemiz jáne ekpe salǵandar mundaı jaǵdaıǵa ne sebepten tap bolǵanyn naqty anyqtaǵymyz keledi. Tekserý jalǵasýda. Biraq qazirgi kezde AstraZeneca vaktsınasynyń paıdasy Covid-19 vırýsy men onymen baılanysty aýrý jáne ólim oqıǵalary qaýpinen joǵary bolyp otyrǵanyn senimmen aıta alamyz»,- dep baıandady Emer Kýk.

EM-nyń tergeý qorytyndylary beısenbi kúni belgili bolady.

Búginde Germanııa, Italııa, Frantsııa, Ispanııa, Portýgalııa, Slovenııa, Islandııa, Irlandııa, Norvegııa, Danııa, Nıderlandy, Indonezııa jáne Venesýelada AstraZeneca preparatymen egýdi ýaqytsha toqtatty. Seısenbide bul elder tizimine Latvııa men Shvetsııa qosyldy.

Al Germanııada óńirlik jáne federaldyq kóshbasshylar EMA tergeýiniń qorytyndysy shyqqansha atalmysh preparatpen vaktsınalaý baǵdarlamasyn keńeıtýdi keıinge qaldyrdy.

Taıland bıligi bolsa, kerisinshe, AstraZeneca vaktsınasyn ýaqytsha qoldanbaý sheshimin ózgertti. Seısenbi kúni bul vaktsınany eldiń premer-mınıstri Praıýt Chan-Ocha saldyrtty. «Kúmándanyp júrgen adamdar bar. Biraq biz dárigerlerge, medıtsınanyń naǵyz mamandaryna senýimiz kerek», - dedi Taıland eliniń úkimet basshysy.

AstraZeneca vaktsınasyn ári qaraı qoldaný sheshimi týraly Avstralııa bıligi de málim etti. Al Kanadanyń premer-mınıstri Djastın Trıýdo otandastaryn Eýropadaǵy reaktsııaǵa qaramastan ekpe saldyrtýdan bas tartpaýǵa shaqyrdy.

Juma kúni AstraZeneca men trombtardyń arasynda baılanys dálelderiniń joq ekenin Dúnıejúzilik densaýlyq saqtaý uıymy da málimdep, úkimetterdi ony pandemııaǵa qarsy kúres quraly retinde qoldanýyn toqtatpaýǵa úndedi.

Aıta keteıik, Brıtanııada bul vaktsına - negizgilerdiń biri, AstraZeneca-nyń birinshi dozasyn mıllıondaǵan adam alyp úlgerdi.

Frantsııa kádimgi testiler anyqtaı bermeıtin koronavırýstyń jańa shtamyn tirkedi

Frantsııa bıligi eldiń batysyndaǵy Bretan óńirinde ǵalymdar koronavırýstyń jańa shtamyn anyqtaǵanyn málimdedi. Bastapqy baǵalaý boıynsha, bul shtamm basqalaryna qaraǵanda áldeqaıda juqpaly nemese qaýipti emes, delingen densaýlyq saqtaý mınıstrliginiń málimdemesinde. Biraq onyń basqa qaýipti ereksheligi bolýy múmkin.

Bul shtamdy juqtyryp alǵan adamdar toby Lanon qalasynyń aýrýhanasynda anyqtaldy. Biraq olardyń keıbirinde indet belgileri bar bolǵanymen, koronavırýsty anyqtaý úshin ádette jasalatyn tıimdi PTR-test teris bolyp shyqqan.

AQSh-ta Covid-19 vırýsyna qarsy antıdeneleri bar sábı dúnıege keldi

Florıda shtatyndaǵy Boka-Ratonnyń pedıatr dárigerleri Pol Gılbert pen Ched Rýdnık qanynda Covid-19 vırýsynan qorǵaıtyn antıdeneleri bar sábıdiń dúnıege kelgenin jáne bul alǵashqy oqıǵa bolyp tabylatynyn aıtty.

Doktor Gılberttiń aıtýynsha, qańtarda densakýlyq saqtaý júıesiniń júkti qyzmetkeri balasyn bosanýǵa úsh apta ýaqyt qalǵanda Moderna vaktsınasynyń ekpesin saldyrtty. Dárigerler bolsa, antıdenelerdiń anasynan balasyna ótý-ótpeýin anyqtaý maqsatynda, bul jaǵdaıdy nazarǵa alǵan.

Sábı dúnıege kelgen kezde olar birden kindiginen qan taldaýyn alyp, antıdenelerdi anyqtady. Antıdeneler nárestege tek anasynan ótýi múmkin ekendigi málimdeldi. Sebebi áıel koronavırýspen aýyrmaǵan, tek indetke qarsy vaktsına saldyrǵan.