Frantsııada koronavırýspen kúreske armııa tartylmaq
BRıÝSSELЬ. QazAqparat – Frantsııa prezıdenti Emmanýel Makron sársenbide COVID-19 koronavırýsyna qarsy kúreste armııalyq operatsııanyń bastalyp, densaýlyq saqtaý júıesine qomaqty ınvestıtsııalar salynatyny týraly jarııa etti. Bul týraly France 24-ke silteme jasaǵan QazAqparat tilshisi habarlaıdy.
Vırýstan eń kóp zardap shekken qalalardyń biri Mıýlýzda ótken baspasóz konferentsııasynda sóz sóılegen Makron daǵdarysty eńserý boıynsha jan jaqty sharalar qoldanylatynyn aıtty.
«Turaqtylyq» atty jańa operatsııanyń aıasynda armııa materıaldyq-tehnıkalyq jáne medıtsınalyq qamtamasyz etýde kómek kórsetedi.
Sondaı-aq, Frantsııa Karıb basseıni, Ońtústik Amerıka jáne Úndi muhıtyndaǵy teńizdiń arǵy jaǵyndaǵy aýmaǵynan patsıentterdi tasymaldaý úshin tikushaqtar jumyldyrady.
Eske sala keteıik, 25 naýryzdaǵy jaǵdaı boıynsha, Frantsııada koronavırýs juqtyrǵan adamdar sany 25 233-ke jetip, 1331 adam kóz jumǵan.
