Frantsııada koronavırýsqa qarsy vaktsınanyń úshinshi dozasy salynbaq

PARIJ. QazAqparat – Frantsııa prezıdenti egde jastaǵy frantsýzdar men densaýlyǵy nashar adamdarǵa koronavırýsqa qarsy vaktsınanyń úshinshi dozasynyń salynýy múmkin ekenin málimdedi. Bul týraly Emmanýel Makron Instagram-da jarııalady, dep habarlaıdy QazAqparat.

«Jan-jaǵynan alyp qaraǵanda, densaýlyǵy álsiz jáne egde jastaǵy adamdarǵa vaktsınanyń úshinshi dozasyn salý qajet. Biz bul iske daıyndyq ústindemiz. Kúzdiń basynan bastaı alamyz», - dedi Makron.

Frantsýz prezıdenti qazirgi ýaqytta Jerorta teńiziniń jaǵalaýynda ornalasqan Breganson fortyndaǵy jazǵy rezıdentsııasynda demalysta. Sol jerden aptanyń basynan beri áleýmettik jelilerde frantsýzdarmen eldi koronavırýstan qorǵaý jáne bıliktiń jańa sharalary týraly belsendi túrde talqylaý júrgizedi.