Frantsııada koronavırýsqa baılanysty kópshilik is-sharalardy ótkizýge tyıym salyndy
BRıÝSSELЬ. QazAqparat - Frantsııa 5 myńnan astam adam qatysatyn is-sharalardy ótkizýge tyıym saldy. Bul qadam koronavırýstyń taralýyna jol bermes úshin jasalyp otyr, dep habarlaıdy QazAqparat France24 silteme jasap.
Eldiń densaýlyq saqtaý mınıstri Olıve Veran senbi kúni úkimet otyrysynan keıin osylaı dep málimdedi.
«Búkil elde jabyq ǵımarattaǵy 5 myńnan astam adam qatysatyn úlken jıyndar keıingi qaldyrylady. Ashyq aspan astyndaǵy sharalar da ótpeıdi. Ol jaǵdaıda ártúrli aýdanda turatyn adamdar bir-birimen aralasyp, vırýs taralýy múmkin», - dedi densaýlyq saqtaý mınıstri.
Olıve Veran sondaı-aq, halyqqa bir-birimen qol alyspaı, frantsýz halqynyń ejelden bergi betten súıip amandasý dástúrin ýaqytsha umyta turýǵa shaqyrdy.
Osy tyıymǵa baılanysty Kann qalasyndaǵy jyljymaly múlik kórmesi maýsym aıynda ótetin boldy. Odan bólek, jeksenbige belgilengen Parıj marafony da keıinge qaldy. Degenmen Birinshi lıganyń fýtbol matchtary keste boıynsha óte beredi.
«Munyń bári ýaqytsha. Ýaqyt óte kele bári ózgeredi. Bul shekteý sharalary koronavırýstyń taralýyna múmkindik bermeıdi degen úmittemin», dep túsindirdi mınıstr.
Onyń aıtýynsha, halyq kerek ony-munysyn satyp alyna, saýda jasaýyna bolady, alaıda maqsatsyz jolǵa shyqpaı, múmkindik bolsa jumysty úıden istegeni durys.
Olıve Veran Frantsııada koronavırýs juqtyrýdyń 16 jańa faktisi tirkelgenin aıtty. Sonymen eldegi vırýsqa shaldyqqandar sany 73 boldy. Eki adam atalmysh indetten kóz jumǵan.
