Frantsııada qazaqstandyq velosportshy Andreı Kıvılevti eske alýǵa arnalǵan velojarys ótedi
ASTANA. Mamyrdyń 25-i. QazAqparat - Frantsııanyń Var departamentiniń Sen-Loran qalasynda tamyzdyń 29-y kúni 2003 jyly «Parıj-Nıtstsa» jarysynda qaıǵyly qazaǵa ushyraǵan qazaqstandyq velosportshy Andreı Kıvılevti eske alýǵa arnalǵan «LA LAURENTINE Andréï KIVILEV» velojarysy ótedi.
Іs-sharany uıymdastyrýshy - «Stade-Laurentin-Cyclisme» sport klýby, olar jarysty 3 kezeńge bólýdi josparlap otyr. Birinshi kezeń saǵat 07.30-da bastalyp, 175 shaqyrymǵa sozylady, ekinshisi 08.00-de bastalyp, 105 shaqyrymǵa, al úshinshi kezeń saǵat 10.00-de bastalyp, 40 shaqyrymǵa sozylady. Dál sol kúni qalanyń bas alańynda jergilikti bılik ókilderiniń qatysýymen jeńimpazdarǵa arnaıy syılyqtar tapsyrylady.
Jarysqa ár túrli jas aralyǵyndaǵy 500-den astam velosportshy qatysady. Onyń ishinde Frantsııanyń ońtústiginde turatyn, velosporttyń jankúıerleri - QR azamattary da bar.
Jarystyń aldynda uıymdastyrýshylar Karrosaqalasyndaǵy Andreı Kıvılevtiń zıratyna gúl shoqtaryn qoıady, dep habarlady Qazaqstan Respýblıkasynyń velosport Federatsııasy.
Andreı Kıvılevtyń jaqyn dosy, qazaqstandyq Astana komandasynyń kóshbasshysy, qazir Giro d'Italia jarysyna qatysyp jatqan Aleksandr Vınokýrov, sondaı-aq Astana komandasynyń basqa da sportshylary qaıtys bolǵan dostaryn eske alatyn «LA LAURENTINE Andréï KIVILEV» velojarysyna byltyrǵydaı qatysýǵa tyrysady.
Andreı Kıvılev 1973 jyly Qazaqstanda dúnıege kelgen. Ol Frantsııada Qazaqstan sportynyń bedelin kóterýge baǵa jetpes úlesin qosqan alǵashqy velosportshylardyń biri.
