Frantsııada kásipodaqtardyń jappaı ereýili boldy
ASTANA. Qyrkúıektiń 8-i. QazAqparat - Frantsýz kásipodaqtary eldegi zeınetaqy júıesin reformalaý josparymen kelispeıtinderin jarııa etip, keshe, qyrkúıektiń 7-sinde jalpyhalyqtyq ereýil uıymdastyrdy. Frantsııa Prezıdenti Nıkolıa Sarkozı óz kezeginde, ókimettiń bul máselege qatysty ustanymy ózgermeıtinin málim etti, dep habarlaıdy ITAR-TASS agenttigi.
Narazylyqty uıymdastyrýshylardyń derekteri boıynsha, jalpyhalyqtyq ereýil Frantsııa boıynsha 2,5 mıllıonǵa jýyq adamnyń basyn qosty - tek qana Parıjdiń ózinde manıfestatsııalarǵa 270 myńdaı adam qatysty. Al eldiń ishki ister mınıstrligi, búkil el boıynsha ereýilge qatysqandardyń sany 1,1 mıllıon ǵana dep habarlap otyr. Degenmen, bul kórsetkishtiń ózi sońǵy jyldardaǵy rekordtyq kórsetkish.
Nıkolıa Sarkozı usynyp otyrǵan reformanyń jobasynda zeınet jasyn qazirgi 60 jastan 2018 jylǵa qaraı 62 jasqa deıin kóterý qarastyrylǵan. Osy bastama Frantsııa boıynsha qyzý jaryssózder týǵyzyp otyr. Kásipodaqtar men oppozıtsııa reformaǵa úzildi-kesildi qarsylyq bildirip, bul áreketti prezıdent Fransýa Mıtterannyń tusynda áleýmettik salada qol jetkizilgen jetistikterge qol suǵýshylyq dep baǵalap otyr. 1982 jyly Mıtteran zeınet jasyn 65-ten 60 jasqa tómendetken bolatyn.
