Frantsııada qar kóshkininiń astynda qalǵan balany ıt tapty
ASTANA. QazAqparat - Frantsııanyń Savoııa departamentindegi taý-shańǵy kýrortynda kóshken qardyń astynda qalǵan 12 jasar bala aman qaldy. Bul týraly 27 jeltoqsan kúni jergilikti jandarmerııa málimdedi, dep habarlaıdy QazAqparat.
Oqys oqıǵa onyń dostarymen birge syrǵanaý úshin jabyq Lıaplan sektoryna barǵan kezinde bolǵan. Qar basyp qalǵan balany Jetro atty ıt tapty.
«Qar astynda bir saǵattaı qalyp qoıǵan balany Jetro jáne ony jetekteýshi serjant Rafael S. Poaplodırýı qutqardy. Bul qudaıdyń qudireti shyǵar, áıtpese, qar astynda adam 15 mınýttan artyq shydaýy óte qıyn», - dep jazdy tártip saqshylary Twitter-de.
Balada onyń qaı jerde ekenin bildiretin detektordyń bolmaýy izdeý jumystaryn qıyndatqan. Abyroı bolǵanda, ony qutqarýdyń sáti tústi.
