Frantsııada ereýilshilerge qarsy kóz jasaýratatyn gaz qoldandy
PARIJ. QazAqparat – Beısenbi kúni Frantsııanyń birneshe qalasynda ondaǵan myń jumysshy el Prezıdenti Emmanıýel Makronnyń josparlaǵan zeınetaqy reformasyna narazylyq bildirý úshin kóshelerge shyqty. Oǵan muǵalimder, dárigerler, áýe dıspetcherleri, temirjol jáne qoǵamdyq kólik jumysshylary qatysqan, dep habarlaıdy «QazAqparat» HAA The Local.fr saıtyna silteme jasap.
Frantsııanyń Іshki ister mınıstrligi eldegi zeınetaqy reformalaryna qarsy demonstratsııalarǵa 800 myńǵa jýyq adam qatysqanyn rastady. Tek Parıj kósheleriniń ózine ǵana 65 myń adam shyqqan. Al Kásipodaqtardyń málimetinshe, ereýilder men narazylyq sharalaryna qatysqandardyń sany anaǵurlym kóp – 1,5 mıllıon adam.
BBC News beısenbi kúni kóptegen týrıstik oryndar, onyń ishinde Eıfel munarasy jabylǵanyn atap ótti. Parıj polıtsııasynyń habarlaýynsha, narazylyq bildirýshiler dúken vıtrınalaryn syndyryp, qalanyń ár jerinde nysandardy órtegen. Olarǵa qarsy kóz jasaýratatyn gaz qoldanyldy.
Bul kúni kóptegen frantsýzdar jumysqa jáne úıge jaıaý barýǵa májbúr boldy. Óıtkeni qoǵamdyq kólik te, metro da jumys istemedi. Parıjdegi metro jelileriniń kópshiligi tolyǵymen jabyldy. Aıta ketý kerek, kúnine 4 mıllıon jolaýshy metro qyzmetin paıdalanady. El áýejaılarynda júzdegen reıs toqtatyldy. Sondaı-aq Frantsııanyń kóptegen mektepterinde sabaqtar bolǵan joq.
Aıta keteıik, Frantsııada sońǵy on jyl ishinde resmı zeınetke shyǵý jasy 60-tan 62-ge ózgertildi. Bul, Ekonomıkalyq yqpaldastyq jáne damý uıymy elderi arasynda eń tómengi zeınettik jas. Mysaly, Ulybrıtanııada zeınetke 66 jasta shyǵýǵa bolady. Al taıaý ýaqytta brıtandyqtar bul mejeni 67 jasqa kóterýdi josparlap otyr.
foto: thelocal.fr