Frantsııada COVID-19 vaktsınasynyń alǵashqy dozasyn 10 mıllıonnan astam turǵyn aldy

NUR-SULTAN. QazAqparat – Qazirgi kezde 10 mıllıonnan astam frantsýzdyq koronavırýsqa qarsy vaktsınanyń alǵashqy dozasyn aldy. Bul týraly beısenbi kúni Frantsııa premer-mınıstri Jan Kasteks Val-de-Marn departamentinde (Il-de-Frans astanalyq aımaǵy) vaktsınatsııa ortalyǵyna barǵan kezde habarlady, dep jazady QazAqparat.

«Biz vaktsınalaý qarqynyn oılaǵanymyzdan bir aptaǵa tezdettik», – dedi Kasteks. Respýblıka Úkimetiniń Twitter-degi paraqshasyndaǵy jazbasyn keltirer bolsaq, ol bylaı dedi: «Qazirdiń ózinde 10 mıllıonnan astam frantsýz vaktsınanyń alǵashqy dozasyn aldy».

Buǵan deıin Frantsııa bıligi 10 mıllıonǵa jýyq frantsýzdy, ıaǵnı el halqynyń shamamen 15%-yn 15 sáýirge deıin egedi dep kútken. Qazir Frantsııada vaktsınanyń ekinshi dozasyn 3 mıllıonnan astam adam aldy.

«Bul óte jaqsy qarqyn. Frantsııa belsendi vaktsınalaýda jáne ony koronavırýsqa qarsy kúrestegi basty mindeti dep sanaıdy», – dedi Kasteks. Premer medıtsınalyq qyzmetkerlerge koronavırýspen kúresý naýqanyna kúsh salǵany úshin alǵys aıtty. «Aptasyna jeti kún boıy barlyq medıtsına qyzmetkerleri halyqty vaktsınatsııalaýǵa jumyldyryldy», – dedi frantsýz mınıstrler kabınetiniń basshysy.

Bıliktiń málimetinshe, Frantsııada osy ýaqytqa deıin 4,8 mıllıonnan astam koronavırýs ınfektsııasy tirkelgen. Іndet saldarynan 97 myńnan astam adam qaıtys boldy. Sońǵy jeti kúnde Frantsııa aýrýhanalaryna 13 myńnan astam naýqas tústi, onyń 5 myńnan astamy reanımatsııa bólimshelerinde jatyr.