Frantsııada búgin prezıdenttik saılaýdyń alǵashqy týry ótedi
ASTANA. QazAqparat - Búgin, jeksenbide Frantsııada prezıdenttik saılaýdyń alǵashqy týry ótedi. Eldegi saılaý ýchaskeleri jergilikti ýaqytpen 8:00-de ashylyp, 19:00-de jabylady. Biraq keıbir iri qalalarda ol bir saǵatqa uzartylyp otyr.
Memleket basshysy saılaýynyń alǵashqy kezeńiniń qorytyndysy boıynsha kóbirek daýys alǵan eki kandıdat qana ekinshi týrǵa ótip, prezıdenttik laýazym úshin kúresetin bolady.
Sarapshylardyń atap ótýinshe, ázirge prezıdenttik saılaýdyń birinshi kezeńiniń qalaı aıaqtalýy beımálim. Óıtkeni bul saıası dodaǵa kúmánmen qaraýshylardyń paıyzy joǵary bolyp otyr.
Saılaýǵa eki apta qalǵan kezde júrgizilgen saýalnamaǵa sáıkes, frantsýzdardyń úshten biri áli kúnge deıin kimge daýys bererin sheshpegen.
Osy sońǵy saýalnamaǵa qaraǵanda, olardyń arasynda Emmanıýel Makron, Marın Le Pen, Fransýa Fııon jáne Jan-Lıýk Melanshonnyń múmkindigi ózgelerden joǵary.
Frantsııada 45,6 mln saılaýshy bar. Buǵan qosa ózge elderdegi 1,3 mln frantsýz da daýys berýge qatysa alady.
Prezıdenttik saılaýdyń ekinshi týry 7 mamyrǵa josparlanǵan.
