Frantsııada bir kúnde koronavırýspen aýyrǵandar sany rekordty kórsetkishke jetti

PARIJ. QazAqparat – Frantsııada sońǵy táýlikte koronavırýs juqtyrýdyń 58 myńnan astam jańa jaǵdaıy anyqtaldy. Bul – epıdemııa bastalǵaly eldegi eń joǵarǵy kórsetkish. Bul týraly Frantsııanyń Ulttyq densaýlyq saqtaý basqarmasynyń basshysy Jerom Salomon málim etti, dep habarlaıdy QazAqparat Euronews agenttigine silteme jasap.

Eldiń Ulttyq densaýlyq saqtaý basqarmasy basshysynyń aıtýynsha, kóktemde aýrýdyń sharyqtaý kezeńinde vırýs juqtyrǵandar sany 8 myńnan aspap edi.

Eýropa elderiniń ishinde Frantsııada koronavırýsqa shaldyǵýshylar sany óte kóp. Munda 1,6 mln adam vırýs juqtyrǵan. Júrgizilgen testiń 20% oń nátıje kórsetedi.

Osy aptanyń alǵashqy úsh kúniniń ózinde elde koronavırýstan 1600-den astam adam kóz jumǵan. 130 myń adam aýrýǵa shaldyqqan. Aýrýhanalardaǵy júktemeler de artqan. Bir apta buryn Frantsııada qaıta engizilgen karantın sharalary esh nátıje berer emes.

Eldiń densaýlyq saqtaý mınıstri Olıve Veran eń aýyr jaǵdaı Overn-Rona-Alpy óńirinde ekenin atap ótti. Bul aımaqtaǵy patsıentter basqa aımaqtarǵa jetkizilýde, óıtkeni atalǵan óńir aýrýhanalarynda bos oryn joq.