Frantsııada basshylarǵa jumystan keıin qyzmetkerlerine qońyraý shalýǵa tyıym salyndy
ASTANA. QazAqparat - Frantsııada jumys berýshilerge jumystan tys ýaqytta qol astyndaǵy qyzmetkerlerine telefon shalýǵa tyıym salyndy. Frantsýzdyq jumys berýshiler federatsııasy men kásipodaqtar uıymy qol qoıǵan kelisimge sáıkes, budan bylaı basshylar aptasyna 133 saǵat boıy (jumys ýaqyty - 35 saǵattan basqa) jumyskerlerine habarlaspaıtyn bolady, dep habarlaıdy Reseı jańalyqtar agenttigi.
Ásirese, atalmysh zań aqparattyq tehnologııalar men konsaltıngtik qyzmetter kórsetetin kompanııalarǵa qatysty. Onyń ishinde Google men Facebook áleýmettik jelileriniń frantsýzdyq keńseleriniń qyzmetkerlerine tikeleı qatysy bar. Atalmysh kompanııalardyń qyzmetkerleri keshki saǵat 18.00-den soń jumys telefondaryn sóndirip qoıyp, al basshylary olardy jumystan tys elektrondyq poshtalaryn tekserýge mindettemeýge kepildik berýi kerek.
Aıta keterligi, frantsýzdar jumys máselesi men ondaǵy tártipke qatań qaraıdy. Olardyń jyl saıyn aqyly alty aptalyq demalys pen densaýlyq kútimine baılanysty úzilis alýǵa quqyǵy bar. Sondaı-aq Fransýa Ollandtyń Sotsıalıstik partııasy bılikke kelisimen elde aptasyna 35 saǵat jumys isteý tártibi bekitilip, zeınetke shyǵý jasy qysqartylǵan bolatyn.
