Frantsııada ata-anasy sýretin ǵalamtorǵa jarııa etkeni úshin balasy sotqa bere alady
ASTANA. QazAqparat - Frantsııada balasynan ruqsat almaı olardyń sýretin jarııalaǵan ata-ana bir jylǵa bas bostandyǵynan aıyrylady nemese 45 myń eýro aıyppul tóleıdi. Áleýmettik jeli paıdalanýshylaryn el bıligi osylaı eskertti, dep habarlaıdy The Telegraph basylymy.
Zańgerlerdiń aıtýyna qaraǵanda, bul zań Frantsııada basqa adamnyń sýretin onyń ruqsatynsyz jarııalaıtyndarǵa jaza belgileıdi. Osylaısha ósip ketken bala ata-anasyn birneshe jyl ótken soń da ózine unamaıtyn sýretin jarııa etkeni úshin sotqa bere alady.
«Menińshe bolashaqta balalardyń ata-anasyna osy máselege qatysty jappaı qarsy bolatyn jaǵdaıǵa jetemiz. Bul olar ósip, óziniń jeke ómiri kishkene kezinen bastap ınternetke jarııa bolyp kelgenin túsingen tusta bastalady», - deıdi Manchester ýnıversıtetiniń professory Nıkola Ýıtton.
Buǵan deıin Frantsııa polıtsııasy ata-analarǵa balalarynyń sýretterin qaýipsizdik úshin jarııa etpeýdi suraǵan bolatyn.
Balalarynyń sýretin jarııalaýǵa qatysty 2015 jylǵy zertteýde ortasha alǵanda eýropalyq ata-ana bala 5 jasqa tolǵanǵa deıin jyl saıyn 200 sýret jarııalaıdy eken.
Feısbýk vıtse-prezıdenti Djeı Parıh kompanııanyń osy máselege qatysty jasaǵan baptaýy týraly málimdedi. «Eger men onlaınǵa balalarymnyń aýlada oınap júrgen sýretin qoıyp bólissem, onda júıe: «Toqtańyz, bul balalaryńyzdy sýreti. Bul sýretterdi otbasy múshelerimen ǵana bólisý kerek. Siz ony kópshilikke jarııa etýdi jón kórip otyrsyz ba?», - degen eskertý shyǵýy kerek deıdi ol.
