Frantsııada apatqa ushyraǵan A320 ushaǵynyń ekinshi ushqyshy ony ádeıi joıǵan - Marsel prokýrory
ASTANA. QazAqparat - Frantsııanyń ońtústiginde apatqa ushyraǵan A320 ushaǵynyń shtýrvalyn apat kezinde ony joıǵysy kelgen ekinshi ushqysh basqarǵan, dep málimdedi Marsel prokýrory baspasóz máslıhatynyń barysynda, dep jazady RBK.
Prokýror Brıs Robenniń aıtýynsha, nemistiń «Germanwings» áýe kompanııasynyń ıeligindegi aerobýstyń ekinshi ushqyshy ushaqty pıkege «sanaly túrde» baǵyttap, jerge qulaý kezinde tiri bolǵan, dep habarlaıdy The Guardian. «Onyń ushaqty joıý nıeti bolǵan», - dedi ol. Ushýdyń sońǵy 30 mınýty týraly aqparat daýystar jazylǵan «qara jáshiktiń» málimetterin oqý kezinde alynǵan.
Prokýror ekıpaj komandıriniń kabınadan shyǵyp ketkende, ekinshi ushqysh basqarýdy ózine alyp, ushaqty tómen baǵyttaǵan. Robenniń aıtýynsha, kabınada úreı belgileri bolǵan joq, ekinshi ushqysh jaqsy tynys alǵan, ol ushaq jerge qulaǵansha birde bir sóz aıtpady. Frantsııalyq prokýror ekinshi ushqyshtyń esimi Andreas Lýbıts ekenin, onyń Germanııa azamaty ekenin málimdedi. Ol 28 jasta bolǵan, dep atap ótedi The Wall Street Journal. Ol Reınland-Pfalts jerindegi Montebaýr qalasynyń týmasy. Reıters Lýbıtstiń tájirıbesinde nebári 630 saǵat bolǵanyn, al negizgi ushqysh eńbek jolynda barlyǵy 6000 saǵat ushqanyn atap ótedi. Bild bergen málimetterge sáıkes, keme komandıriniń esimi Patrık S. bolǵan, ol Dıýsseldorfta dúnıege kelgen. Ushýdyń sońǵy 10 mınýtynda komandır ekinshi ushqyshty jabyq turǵan esiktiń ar jaǵynan birneshe ret shaqyrdy. Prokýror Lýbıtstiń áreketterin ózin-ózi óltirý dep ataýdan bas tartty, sondaı-aq onyń «lańkes retinde tanylmaǵanyn» málimdegen. Ol apattyń lańkestik áreket bolǵanyn kórsetetin eshqandaı málimetterdiń ázirge joq ekenin atap ótti. «Men ony ózin-ózi óltirý dep aıta almaımyn, biraq is júzinde bul nusqany qarastyrý kerek», - dedi Roben. «Qara jáshiktiń» jazbalaryn oqý kezinde apattyq jaǵdaıdyń oryn alýyna 20 mınýt qalǵanda eki ushqyshtyń bir-birimen jaqsy sóıleskeni ańǵarylady. «Biz ushaqtyń qulaýyna birneshe mınýt qalǵandaǵy aıqaı-shýdy estı alatyn edik», - dedi Roben. Marseldegi dıspetcherlerdiń ushaqpen baılanysqa shyǵýǵa birneshe ret árekettengenderine qaramastan, olarǵa eshkim jaýap bermedi, dep túıindedi prokýror. Esterińizge sala keteıik, nemistiń «Germanwings» loýkosteriniń «Airbus A320» ushaǵy 24 naýryz kúni frantsııalyq Alpide apatqa ushyrady. «Barselona-Dıýsseldorf» baǵytymen ushyp kele jatqan áýe kemesiniń ishinde 144 jolaýshy men ekıpajdyń alty múshesi bolǵan. Ushyp shyqqannan keıin 30-40 mınýt ótken soń kreıserlik bıiktikke endi ǵana jetken laıner tómendeı bastaǵan. Budan keıin dıspetcherler onymen baılanysty úzip aldy. Ushaqtyń synyqtary Joǵary Provanstaǵy Alpi departamentinde teńiz deńgeıinen 2 shaqyrymǵa jýyq bıiktiktegi shatqaldan tabyldy.
