Frantsııada alpınısterden qutqarý jáne jerleý rásimine depozıt alý usynyldy

NUR-SULTAN. QazAqparat – Sen-Jerve-le-Ben meri Monblan bıigine kóterilgisi keletin alpınısterge 15 myń eýro depozıt tóleýdi mindetteýdi usyndy. Onyń 10 myńy – qutqarýshylar qyzmeti, al 5 myńy – jerleý rásimi qajet bolǵan jaǵdaıda alynbaq, dep habarlaıdy QazAqparat Euronews-ke silteme jasap.

Jergilikti bılik daıyndyǵy nashar jáne qaýip týraly eskertýlerge qaramastan jazdyń ystyǵynda taýǵa shyǵatyn týrıstermen osylaı kúrespek.

«Bul – nazar aýdartý tásili. Erejeni buzatyndar bar kezde, onyń saldary da bolatynyn árkim bilýi kerek. Olar qaıǵyly jaǵdaıǵa ushyraýy múmkin, al qutqarýshylar olardy aman alyp qalýǵa nemese denelerin izdeýge shyǵady», - deıdi Sen-Jerve-le-Ben kommýnasynyń meri Jan-Mark Peıeks.

Aıtýynsha, mundaı oı rýmynııalyq saıahatshylar toby ústilerindegi shorty, krossovkı jáne saban qalpaqpen Eýropanyń eń bıik núktesine shyqpaq bolǵan kezde týyndaǵan.

Osy jazdaǵy aptap ystyqtan taýdan iri tastar qulap, kóshkin júrgen. Taý basyna shyǵýǵa resmı túrde tyıym salynbaǵan, biraq aımaqtaǵy kásibı gıdter keminde 15 tamyzǵa deıin týrısterdi taýǵa shyǵarýdy toqtatty.

Foto: ru.euronews.com