Frantsııada 20 jylǵa sottalǵan qazaqstandyq kinásiz dep tanyldy
ASTANA. QazAqparat – Frantsııada 20 jylǵa bas bostandyǵynan aıyrylǵan qazaqstandyq Sofııa Bodnarchýk kinásiz dep tanyldy. Bul týraly QazAqparat tilshisi Habar 24 telearnasyna silteme jasap habarlaıdy.
Osydan 11 jyl buryn qaraǵandylyq Sofııa Bodnarchýk Frantsııaǵa attanyp, sol eldiń azamatyna turmysqa shyqqan. Degenmen 2016 jyly onyń jubaıy Sofııa men eki jasar qyzynyń kózinshe óz ata-anasyn atyp óltirdi.
Oqıǵadan keıin qazaqstandyq bes jarym jylǵa jýyq ýaqytyn frantsýz túrmesinde ótkizdi. Oǵan bul iste sybaılas boldy degen aıyp taǵyldy. Sot protsesinde kúıeýiniń týystary jaldaǵan 6 advokat Sofııa Bodnarchýkke qarsy sóz sóıledi.
Bul aralyqta Sofııaǵa otandastary qoldaý bildirdi. Keıin bul iske bilgili zańger Edýard Marsıal kiristi.
«Men jalǵyz qaldym. Ne frantsýz tilin, ne zań bilmeımin. Degenmen meni elshilik ókilderi qoldady. Burynǵy elshi Jan Ǵalıev pen zań keńesshisi Rústem Ómirzaqovqa alǵysymdy bildiremin. Osy jyldar ishinde olar maǵan qoldaý kórsetti, sot protsesterinde boldy», - dedi Sofııa Bodnarchýk.
Advokat Edýard Marsıaldiń aıtýynsha, ádiletsiz úkimniń basty sebebi – ózgelerdiń nemquraıdylyǵy.
«Ony árqashan sybaılas retinde qarastyrdy. Onyń aıǵaqtaryna senimsizdik tanytty. Saldarynan sotta Sofııaǵa baı frantsýzdyń múlkin ıemdenbek bolǵan dep kúmán keltirildi. Ol sot úkimimen 20 jylǵa bas bostandyǵynan aıyryldy. Bul men úshin kútpegen sheshim boldy. Men qaı jerde, qandaı aǵattyq jibergenimdi túsinbedim», - dedi advokat Edýard Marsıal.
Alaıda, sońynda is Sofııa Bodnarchýktyń paıdasyna sheshildi. Endi Frantsııa tarapy ádiletsiz úkimnen keltirilgen zalaldy óteýi tıis. Óziniń kinásizdigin dáleldegen qazaqstandyq endi ata-ana quqyǵyn qaıtarýǵa nıetti.
