Frantsııada 19 óńirde ǵana jarııalanǵan karantın endi barlyq departamentte kúshine enetin boldy

NUR-SULTAN. QazAqparat – Frantsııanyń 19 óńirinde ǵana kúshinde turǵan karantın rejımi endi eldiń barlyq óńirinde de jarııalanady. Bul týraly el prezıdenti Emmanıýel Makron telearna arqyly halyqqa jasaǵan úndeýinde aıtty, dep habarlaıdy «QazAqparat» HAA TASS agenttigine silteme jasap.

«Naýryz aıynda eldiń 19 departamentinde jarııalanǵan karantın rejımi endi eldiń barlyq óńirlerinde de kúshine enetin bolady», - dedi ol.

Memleket basshysynyń aıtýynsha, bul shekteý kem degende aldaǵy tórt apta boıy alynbaıdy.

Makron karantın rejımi eldiń barlyq óńirinde jarııalanýyna koronavırýstyń brıtandyq shtamynyń taralýy kúsheıip ketýi sebep bolǵanyn aıtty.

Odan bólek, prezıdent el bıligi qoǵamdyq tártipti qadaǵalaýdy da kúsheıtetinin málimdedi. Budan bylaı, karantın shekteýleri alynǵansha, adamdardyń bir jerde toptasýyna jol berilmeıdi.

«Biz jeke adamdardyń saqtyq sharalary arqyly osyǵan deıin qol jetkizgen nátıjemizdi buzýyna jol bermeımiz. Baqylaý men sanktsııa qatańdatylady», - dep atap ótti ol.