Frantsııa jurtshylyǵy vaktsınatsııanyń baıaý qarqyny úshin el úkimetin synady
BRıÝSSELЬ. QazAqparat – Frantsýz bıligi halyqty Covid-19-ǵa qarsy vaktsınatsııalaý úderisiniń baıaý qarqyny úshin sársenbide synǵa ushyrady, dep habarlaıdy QazAqparat menshikti tilshisi.
Frantsýz buqaralyq aqparat quraldary Eýropalyq Odaqtyń «Pfizer-BioNTech» preparatymen vaktsınatsııaǵa resmı túrde ruqsat bergenine bes kún bolǵanyna qaramastan, ekpe alǵan adamdardyń sany EO-nyń basqa elderindegideı joǵary emes ekenin habarlaıdy.
Alǵashqy úsh kúnde vaktsınany 100-den az adam alǵan dep habarlaıdy. Al Germanııada 42 myń adam vaktsınatsııalanǵan. Bul statıstıka Úkimettiń vaktsınatsııaǵa saqtyqpen qaraý múmkindigin kórsetedi.
EO-dan úsh apta buryn Pfizer-BioNTech vaktsınasyn saldyrýdy bastaǵan Ulybrıtanııa qazirdiń ózinde júz myńdaǵan adamǵa vaktsına egip úlgerdi. AQSh-ta preparatty 1 mıllıonnan astam adam qabyldady.
Parıjdegi Jorja Pompıdý aýrýhanasynyń jedel qyzmetiniń basshysy Fılıpp Jıýven Frantsııada ulttyq vaktsınatsııa strategııasy ázirge joq dep sanaıdy.
«Adam retinde men vaktsınatsııalanyp, úlgi kórsetip, adamdarǵa vaktsınadan emes, COVID-19-dan óletinimizdi kórsetkim keledi», - dedi dáriger jergilikti BAQ-qa.
Saýalnamalar kórsetkendeı, frantsýzdardyń tek 40 paıyzy ǵana vaktsına alǵysy keledi.
Seısenbide Ulttyq telearnadan sóılegen eldiń Densaýlyq saqtaý mınıstri Olıve Veran Frantsııadaǵy vaktsınatsııanyń neǵurlym ólshengen qarqynyn qorǵap, «sheneýnikterge adamdardy vaktsınatsııa ıdeıasyna ıtermeleý úshin ýaqyt qajet» dep málimdedi.
«Bul jumysty bastaýǵa biraz ýaqyt ketedi», - dedi ol.
Arnur Rahymbekov
