Frantsııa jemqorlyqpen qalaı kúresip jatqanyn elordadaǵy konferentsııada aıtty
Frantsııanyń Qazaqstandaǵy Elshisi Fılıpp Martıneniń aıtýynsha, 2020 jyldyń basynda Qazaqstan men Frantsııanyń Sybaılas jemqorlyqqa qarsy qyzmetteri uzaqmerzimdi yntymaqtastyq týraly kelisimge qol qoıýdy josparlap otyr.
«Bizde qazaqstandyq áriptesterimizben yntymaqtastyqty jalǵastyratyn Ulttyq sýdıalar mektebiniń delegatsııasy bar. Bul – bir jyldyq másele emes, urpaq máselesi, aldyn alý máselesi dep oılaımyz. Jáne adamdardy balalyq shaǵynan bastap ózgertý kerek. Bul – bárine ortaq qubylys», - dedi Fılıpp Martıne konferentsııa sheńberinde tilshilerge bergen suhbatynda.
Sondaı-aq, elshi Frantsııa jemqorlyqpen qalaı kúresip jatqandyǵynan mysaldar keltirdi.
«Biz zańnamany (sybaılas jemqorlyqqa qarsy is-qımyl máseleleri boıynsha) qatańdattyq. Mınıstrler Keńesindegi barlyq adamdar ózderiniń áreketteri týraly tolyq esep berýge májbúr etildi. Olar laýazymǵa taǵaıyndalǵan kezde jáne jumystan bosatylǵannan keıin eshqandaı aqsha almaǵanyn dáleldep, esep beredi. Frantsııada ár mınıstrlikte sheneýnikterge qatysty erejeler men usynys jazatyn adamdar bar, bul olardyń zańǵa qurmetpen qaraýyna sebepshi bolady. Mysaly, Frantsııa SІM-de quny 300 eýrodan asatyn syılyqtardy qabyldaýǵa tyıym salynady. Eger men ony alsam, ony qaıtaryp, qaıtarǵanym týraly kýálikke qol qoıýym kerek», - deıdi ol.
Al Frantsııanyń Jemqorlyqqa qarsy qyzmetiniń ókili Manıýel Fara elde paraqorlyq máselesi áli de baryn aıtty.
«Qabyldanǵan sharalarǵa qatysty naqty nátıje bar ekeni týraly aıtý qıyn. Eger reıtıngilik derekterge kóz júgirtetin bolsaq, sońǵy 10 jylda jaǵdaıdyń jaqsarý úrdisi baıqaldy. Frantsııa búginde barlyq elder arasynda (sybaılas jemqorlyq jóninen) 20-orynda tur. Biz barlyq memleketter úshin shemalar ortaq ekenine kóz jetkizdik. Bul, memleket qarajatyn urlaý, aqshany zańdastyrý jáne shetelge aqsha aýdarý kezinde kórinedi. Sondyqtan, kúrestiń jalpy ortaq ádisteri bar», - deıdi ol.