Frantsııa sportshylary qysqy Olımpıadaǵa barmaýy múmkin
ASTANA. QazAqparat - Frantsııa quramasy eger sportshylardyń qaýipsizdigine kepildik berilmeıtin bolsa, 2018 jyly Ońtústik Koreıanyń Phenchhan qalasynda ótetin qysqy Olımpıada oıyndaryna barmaıdy.
Bul jaıly Frantsııa sport mınıstri Lora Flessel málimdedi.
Eger daǵdarys kúsheıip, «qaýipsizdik kepildenbese, frantsýz komandasy úıde qalady», - degen mınıstrdiń RTL radıostantsııasynda sóılegen sózin keltiredi Reuters.
KHDR qyrkúıekte ıadrolyq synaqtar ótkizdi jáne taǵy bir ballıstıkalyq zymyranyn ushyrdy. Ol Japonııanyń soltústigindegi Hokkaıdo aralynyń ústinen ushyp ótip, Tynyq muhıtqa baryp qulaǵan. Phenıannyń arandatýshylyq áreketine jaýap retinde BUU Qaýipsizdik Keńesi osy elge qarsy qatań sanktsııalar kózdelgen qarar qabyldady.
Phenchhandaǵy 2018 jylǵy qysqy Olımpıada oıyndary 9-25 aqpan kúnderi ótedi.
