Frantsııa prezıdentiniń reıtıngisi úsh aı boıy tómendep keledi
ASTANA. 26 tamyz. QazAqparat - Frantsııa prezıdentiniń saılaýynda kóktemde jeńip shyqqan sotsıalıst Fransýa Ollandtyń frantsýzdar arasynda tanymaldyǵy tómendeı túsýde.
Onyń reıtıngisi úshinshi aı boıy tómen syrǵyp keledi, dep habarlady Reıter agenttigi frantsýz BAQ-taryna silteme jasap.
Tamyz aıynda frantsýz kóshbasshysynyń reıtıngisi 54 paıyz boldy. Mamyr aıynda bul kórsetkish 61 paıyz bolǵan edi. Prezıdenttiń tanymaldyǵynyń tómendeýi Frantsııada jumyssyzdyq deńgeıi tómendeýiniń jáne ekonomıka quldyraýynyń saqtalýymen baılanysty. 2013 jyly Frantsııa Eýroodaqtyń bıýdjet jetispeýshiligi boıynsha jańa talaptaryna saı bolýy úshin memlekettik bıýdjetti 33 mlrd. eýroǵa qysqartýyna týra keledi.
Frantsýz úkimetiniń basshysy Jan-Mark Ero da óziniń tanymaldyǵyn joǵaltýda. Tamyz aıynda onyń reıtıngisi 4 pýnktke tómendep, 57 paıyzdy qurady. Premer-mınıstr bolǵan alǵashqy eki aıda ony frantsýzdardyń 65 paıyzy qoldaǵan bolatyn.
Saýaldama 23-24 tamyz kúnderi 18 jastan asqan 920 frantsýzdyń arasynda júrgizildi.
Taǵy bir málimetter boıynsha tamyz aıynda frantsýzdardyń 49 paıyzy F.Ollandtyń kóshbasshylyq qasıetterine senim bildirdi, bul shilde aıyndaǵy kórsetkishten 5 paıyzǵa az.
F.Olland Frantsııa prezıdenti oryntaǵyna 2012 jylǵy 6 mamyrda saılandy. Ol - F.Mıtterannan keıingi ekinshi sotsıalıst-prezıdent.
