Frantsııa prezıdenti minberde sóılep turǵanda myltyq atyldy
ASTANA. QazAqparat - Frantsııa el prezıdenti Fransýa Olland sóz sóılep turǵanda polıtsııa mergeniniń myltyǵy baıqaýsyzda atylyp ketti. Qańǵyǵan oqtan daıashy jáne taǵy bir qyzmetker jaraqat aldy, dep habarlaıdy Bı-Bı-Sı agenttigi.
Oqys oqıǵa Frantsııanyń batysyndaǵy Vılonon kommýnasynda boldy, onda Olland júrdek poıyzdardyń jańa jelisin ashý saltanaty kezinde sóz sóılep jatqan. Oq atylǵan kezde prezıdent sózin toqtatyp: «Menińshe aıtarlyqtaı eshteńe bolmaǵan sekildi», dep málim etti.
Jergilikti BAQ-tardyń habarlaýynsha, mergen qarýynyń oq atylmaıtyn tetigin basýdy umytyp ketken. Zardap shekkenderdiń ekeýiniń de aıaǵy jaralanǵan. Olar qazir aýrýhanaǵa jetkizildi. Polıtsııa osy oqıǵaǵa qatysty tergeýdi bastady.
