Frantsııa Parlamenti kópshilik oryndarda páranja kııýge tyıym saldy
ASTANA. Qyrkúıektiń 15-i. QazAqparat - Keshe, qyrkúıektiń 14-inde Frantsııa Parlamenti qoǵamdyq oryndarda páranja kııýge tyıym salatyn zań qabyldady. Zań jobasyn Frantsııa Senaty maquldady. Shilde aıynda Parlamenttiń tómengi palatasy - Ulttyq jınalys bul zań jobasyn qoldap daýys bergen bolatyn, dep habarlaıdy ITAR-TASS agenttigi.
Osylaısha, qoǵamdyq oryndarda «bet-basty tumshalaıtyn kıimdi», ıaǵnı páranja men nıkabty kııýge tolyq tyıym salynyp otyr. Bul zańdy buzǵan qyz-kelinshekterdi 150 eýro kóleminde aıyppul kútip tur, jáne bul jaza azamattyq tártip normalary týraly dáris kýrsymen tolyqtyrylýy nemese almastyrylýy múmkin. Al áıelderin páranja kııýge májbúrleıtin er azamattar úshin 1 jyl merzimge deıin túrme jáne oǵan qosymsha 30 myń eýro aıyppul qarastyrylǵan.
Degenmen, bul zań 2011 jyldyń kókteminen bastap qoldanysqa enedi - Parlament sheshimimen bastapqy alty aılyq kezeńde jańa zań tek «pedagogıkalyq qoldanysta» bolady. Osy kezeńde polıtseıler men jandarmdar páranja jáne nıkab kıip júrgen áıelderge olardyń qoǵamdyq tártipti buzyp júrgenderin aıtyp, tek eskertý jasaıtyn bolady. Al Konstıtýtsııalyq keńes bir aıdan keıin ótetin óz otyrysynda bul zańdy konstıtýtsııanyń baptaryna sáıkes kelmeıdi dep tapsa, jańa zańnyń kúshi toqtatylýy múmkin.
Páranja kııýge tyıym salý týraly zań jobasy Belgııa parlamentinde de qaralyp jatyr. Sondaı-aq, Shveıtsarııada da páranja kııýge tyıym salý týraly usynys jasaldy. Degenmen, birqatar sarapshylar, dástúrli musylman kıimderine tyıym salý bastamasy Eýropada turyp jatqan mıllıondaǵan musylmannyń narazylyǵyn týǵyzýy múmkin ekendigin aıtyp otyr.
