Frantsııa men BAÁ Parsy shyǵanaǵyndaǵy turaqtylyq pen qaýipsizdikke shaqyrýda
ÁBÝ-DÁBI. 16 qańtar. QazAqparat - «Bolashaq energetıkasy dúnıejúzilik sammıti» 6-shy jylsaıynǵy halyqaralyq konferentsııasy aıasynda Birikken Arab Ámirlikterine saparmen Frantsııa prezıdenti Fransýa Olland keldi.
«Bolashaq energetıkasy dúnıejúzilik sammıti» Ábý-Dábıge álemniń 150 elinen 30 myńnan astam qatysýshyny jınady. Sammıt barysynda jahandyq bolashaq energetıkasy, sý, qorshaǵan orta, jańǵyrmaly energııa kózderi jáne basqa da ózekti máseleler boıynsha saıasatkerler, iskerlik, ǵylymı-sarapshylyq ortalar ókilderiniń arasynda pikir almasýlar ótedi dep kútilýde.
Frantsııa prezıdenti Fransýa Olland qurmetti qonaqtardyń biri boldy, ol sharanyń ashylýyna qatysyp, BAÁ basshylyǵymen resmı kezdesýler ótkizdi.
Seısenbi kúni «Al Dııafa» rezıdentsııasynda BAÁ-niń prezıdenti sheıh Halıf bın Zaıed Al Nahaııan Frantsııanyń basshysy F. Olladpen kezdesti. Kelissiózder barysynda eki tarap ta Parsy shyǵanaǵy óńiri men Taıaý Shyǵystaǵy qaýipsizdik pen turaqtylyqty odan ári bekitý isinde halyqaralyq qaýymdastyqtyń qolǵabys etýiniń qajettiligin atap ótti. Bul qadamdar halyqaralyq qarar aıasynda jáne egemendi memleketti syılaý qaǵıdalary jáne beıbitshilikti nyǵaıtý negizinde iske asyrylýǵa baǵyttalǵan.
