Frantsııa koronavırýspen kúresý úshin qozǵalysty shekteıdi
NUR-SULTAN. QazAqparat – Frantsııa SARS-CoV-2 koronavırýsynyń taralýymen kúres maqsatynda júris-turysqa shekteý qoıady, dep habarlaıdy QazAqparat dw.com-ǵa silteme jasap.
«17 naýryzdan bastap azamattar úıinde bolýy kerek, syrtqa tek azyq-túlik alýǵa, dárigerge qaralýǵa jáne jumysqa barý úshin ǵana shyǵý kerek», - dep málimdedi Frantsııa prezıdenti Emmanıýel Makron dúısenbi kúngi teleúndeýinde.
Ol atalǵan sharalardyń kem degende 15 kúnge jalǵasatynyn atap ótti. Budan bólek bılik qazirgi barlyq reformany toqtatty, al mýnıtsıaldy saılaýdyń ekinshi kezeńi keıinge aýystyryldy. Eýroodaq ishki shekaralardy 17 naýryzdan bastap jabatynyn habarlady Emmanıýel Makron.
Birneshe saǵat buryn Eýrokomıssııa tóraǵasy Ýrsýla fon der Lıaıen (Ursula von der Leyen) jańa koronavırýstyń taralýyna baılanysty EO aýmaǵyna kirýge ýaqytsha tyıym salý týraly usynys jasaǵan bolatyn.
Eske sala keteıik, COVID-19 koronavırýsy 2019 jyldyń sońynda Qytaıdyń Hýbeı provıntsııasynda paıda bolǵan. Sodan beri bul indet 160-tan astam elge tarady. Álem boıynsha vırýs juqtyrǵan 180 myńnan astam jaǵdaı anyqtalǵan, 7 myńǵa jýyq adam kóz jumǵan, 78 myń naýqas jazylyp shyqqan.
Vırýstan kóz jumǵandar sany boıynsha kósh bastap turǵan elder: Qytaı, Italııa jáne Iran. DDSU Eýropany jańa aýrýdyń pandemııa oshaǵy dep jarııalady.
Frantsııada 6 633 adam koroavırýs juqtyrǵany anyqtaldy, onyń 148-i qaıtys boldy.
Eske sala ketsek, Frantsııada 13 naýryzda mektepter, ýnıversıtetter men balabaqshalar jabylǵan bolatyn.
